आइसीई र इलेक्ट्रिक विकल्प भएको भारतको पहिलो कार टाटा कर्भको पेट्रोल र डिजेल संस्करण लन्च

टाटा मोटर्सले कर्भको पेट्रोल र डिजेल भेरिएन्ट लन्च गरेको छ । सो टाटा कर्भ कुल ८ भेरिएन्टमा प्रस्तुत गरिएको छ । यसको इन्ट्री लेभल पेट्रोल भेरिएन्टको मूल्य १० लाख र डिजेल भेरिएन्टको मूल्य ११ लाख ५ हजार भारुमा लन्च गरिएको हो ।

यसअघि टाटाले कुपे एसयूभी कर्भको इलेक्ट्रिक संस्करण १७ लाख ४९ हजार प्रारम्भिक मूल्यमा लन्च गरेको थियो । सो एसयूभी इलेक्ट्रिक, पेट्रोल र डिजेल इन्जिन विकल्प भएको भारतको पहिलो कार हो । साथै यो भारतको पहिलो कुपे एसयूभी पनि हो ।

सो कुपे एसयूभीको बुकिङ पनि सुरु भइसकेको छ र सेप्टेम्बर १२ देखि यसको डेलिभरी सुरु हुनेछ । कर्भले नयाँ सिट्रोन बसाल्ट कुपे एसयूभीका साथै हुन्डाई क्रेटा, किया सेल्टोस, सुजुकी ग्रान्ड भिटारा, टोयोटा हाइराइडर, होन्डा एलिभेट, एमजी एस्टर र स्कोडा कुशाक जस्ता एसयूभीसँग प्रतिस्पर्धा गर्नेछ ।

सो एसयूभी नयाँ एटलस प्लेटफर्ममा आधारित छ । नयाँ कर्भ १२० एचपी र १७० एनएमको टर्क जेनेरेट गर्ने १.२ लिटर तीन सिलिन्डर टर्बो पेट्रोल इन्जिन, ११८ एचपी पावर जेनेरेट गर्ने १.५ लिटर डिजेल इन्जिन र नयाँ १.२ लिटर डाइरेक्ट इन्जेक्सन टर्बो पेट्रोल ‘हाइपेरियन’ इन्जिन गरी ३ इन्जिन विकल्पमा रहेको छ ।

यसमा जेस्चर कन्ट्रोल, १८ इन्च अलोय ह्विल, फ्लस डोर ह्यान्डल, १२.३ इन्च टचस्क्रिन इन्फोटेनमेन्ट सिस्टम, फुल्ली डिजिटल ड्राइभर डिस्प्ले, पानोरामिक सनरुफ, रिक्लिनिङ रियर सिट र भेन्टिलेटेड फ्रन्ट सिट सहितको सेगमेन्ट फर्स्ट पावर्ड टेलगेट फिचर समावेश छ ।

सेफ्टीका लागि कर्भमा ६ एयरब्याग, लेभल २ एडीएएस, ईएससी, फोर ह्विल डिस्क ब्रेक, टीपीएमएस, ३६० डिग्री क्यामेरा, अटो होल्डसहितको इलेक्ट्रोनिक पार्किङ ब्रेक उपलब्ध गराइएको छ ।