भेन्यु पछि आई १० र क्रेटा पनि नेपालमै एसेम्बल हुने

काठमाडौं – लक्ष्मी मोटर कर्पोरेसनले हुन्डाई भेन्यु बजारमा उपलब्ध गराए पश्चात आगामी दिनमा हुन्डाईका अन्य दुुई मोडल आई १० र क्रेटा पनि एसेम्बल गर्ने भएको छ । कम्पनीले नवलपरासीको रामग्रामस्थित एसेम्बली प्लान्टबाट उत्पादन गरिएको हुन्डाई भेन्यु सार्वजनिक गरेको छ ।

पहिले देखि नै नेपाली बजारमा हुन्डाईका सवारी साधन उपलब्ध गराउदै आएको लक्ष्मी इन्टरकन्टिनेन्टल वास्तवमा लक्ष्मी ग्रुप अन्तर्गतको कम्पनी हो । अब नेपालमै सवारी साधन उत्पादन गर्ने लक्ष्यका साथ लक्ष्मी ग्रुपले लक्ष्मी मोटर कर्पोरेसनको स्थापना गरेको छ र सो प्लान्टको सञ्चालन लक्ष्मी मोटर कर्पोरेसनले नै गरिरहेको छ ।

लक्ष्मी इन्टरकन्टिनेन्टलका महाप्रबन्धक दीपक थपलियाका अनुसार करिव एक वर्षभित्रै अन्य गाडीको एसेम्बल पनि शुरु हुनेछ । यसो भएमा नेपाली ग्राहकले यही एसेम्बल भएका हुन्डाईका गाडी चढ्न पाउने छन् ।

यी सवारी साधनको सफलता मापन पश्चात मात्र भविष्यमा विद्युतीय गाडी समेत एसेम्बल गर्न सकिने कम्पनीको भनाइ छ । हाल हुन्डाईले नेपालमा कोना र आयोनिक ५ विद्युतीय गाडी बिक्री गरिरहेको छ ।

नवलपरासीको परासीमा रहेको लक्ष्मी मोटर कर्पोरेसनद्वारा संचालित हुन्डाई भेइकल एसेम्बली प्लान्ट १० बिघा क्षेत्रफलमा फैलिएको छ । वार्षिक ५ हजार कार उत्पादन गर्ने क्षमता भएको सो प्लान्टमा हाल एसेम्बली सप र टेस्ट लाइनको कार्य भइरहेको छ ।

कुनै पनि सवारी साधन उत्पादन गर्नका लागि पाँच चरण पुरा गर्नुुपर्छ । ती पाँच चरण मध्ये पहिलो चरण प्रेस सप अर्थात स्ट्याम्पिङ, दोस्रो चरण बडी सप अर्थात वेल्डिङ र तेस्रो चरण पेन्ट सप हो । पहिलो चरणमा स्ट्याम्पिङ गरेर आवश्यक पार्ट्स तयार गरे पछि त्यसलाई जोड्ने अर्थात वेल्डिङ कार्य गरिन्छ । त्यसैगरी तेस्रो चरणमा पेन्ट सप अर्थात पेन्टिङ कार्य गरिन्छ ।

चौथो चरणमा एसेम्बली सप र पाँचौ चरणमा टेस्ट लाइन कार्य हुन्छ । नेपालमा हाल यही चौथो र पाँचौ चरणको कार्य हुने गरेको छ । कोरिया र भारतमा पहिलो तीन चरण पार गरेर ल्याइएका इन्जिन, बडी र विभिन्न पार्ट्सलाई एसेम्बल गर्ने र अन्तिममा टेस्ट गर्ने कार्य यहाँ हुने गरेको छ ।

यसका लागि प्लान्ट भित्र मेन एसेम्बली लाइन, सब एसेम्बली लाइन, टेस्ट लाइन, १.१ किलोमिटर लामो रोड टेस्ट ट्रयाक, वाटर सावर टेस्ट बुुथ र फाइनल इन्स्पेक्सन जस्ता एसेम्बली फ्यासिलिटी रहेको छ ।