३.५ वर्षमा आयोनिक५ मा ६ लाख ६० हजार किलोमिटर यात्रा, सोसल मिडियामा भाइरल

काठमाडौं–विद्युतिय सवारीसाधनको प्रयोग बढ्दै जाँदा यससंग जोडिएर आउने अनौठा र रोचक घटनाक्रमसमेत सार्बजनिक हुनेक्रम बढ्दो छ । यसैक्रममा, कोरियाका एक गाडी धनीले आफ्नो हुन्डाई आयोनिक५ ले ३ वर्ष ५ महिनामा ६ लाख ६६ हजार २५५ किलोमिटर यात्रा तय गरेको दाबी सहित सामाजिक सञ्जालमा एक पोष्ट सार्बजनिक गरेका छन् ।

आफ्नो कारले यति धेरै यात्रा गरेको प्रमाणस्वरुप उनले ओडोमिटरमा लेखिएको अंकसहित पोष्ट गरेपछि उनी अहिले दक्षिण कोरियामा भाइरल बनेका हुन् । उनले प्रयोग गर्दै आएको आयोनिक५ २०२३ मोडल भएपनि कुन भेरिएन्ट हो भन्नेवारे खुलेको छैन ।

पेशाले सेल्सम्यान रहेका उनले यति छोटो अबधीमा कसरी एउटै ईभीमा यति धेरै लामो यात्रा गरे भन्ने विषयले सबैलाई चकित बनाएको छ । ३ वर्ष ५ महिनामा ६ लाख ६० हजारभन्दा बढी किलोमिटर यात्रा गर्न औषतमा दैनिक ५४० किलोमिटरका दरले यात्रा गर्नुपर्ने र यो संभव नभएको धेरैले प्रतिक्रिया जनाएका छन् ।

५४० किलोमिटरका दरले यात्रा गर्न कोरियामा ५ देखी ६ घण्टासम्म नियमित ड्राइभिङ गर्नुपर्ने र हप्तामा शनिबार र आइतबार विदा हुने भएपनि उनले कसरी यति लामो यात्रा गरे भन्ने विषयले धेरैलाई चकित बनाएको हो । कार उनी आँफैले चलाए अर्थात ड्राइभर राखेर यात्रा गरे भन्ने विषय समेत खुल्न सकेको छैन ।

अझ रोचक कुरो त के छ भने, यति धेरै यात्रा तय गर्ने उनको आयोनिक५ कारको ओर्जिनल ब्याट्रीले ५ लाख ८० हजार किलोमिटरसम्म काम गरेको थियो । त्यसपछि भने ब्याट्रीमा खरावी आएको र हुन्डाईले निशूल्क नयाँ ब्याट्री रिप्लेस गरिदिएको उल्लेख छ ।

आयोनिक५ को ब्याट्रीमा हुन्डाईले ८ देखी १० वर्षसम्म अर्थात १ लाख ६० हजार किलोमिटर सम्मको वारेन्टि दिँदै आएको छ । यो घटनाबाट अचम्मित हुँदै हुन्डाई मोटर्सले उनलाई ब्याट्री निशूल्क फेरिदिएको उल्लेख गरिएको छ।