न्यूयोर्क अटो शोमा हुन्डाईले देखायो नयाँ अफ रोड कन्सेप्ट ‘बोल्डर’

हुन्डाईले न्यूयोर्क अटो शोमा आफ्नो नयाँ अफ -रोड कन्सेप्ट गाडी बोल्डर पेश गरेको छ । सो एसयूभी विशेष गरी कठिन भू-भाग र पहाडी क्षेत्र लागि डिजाइन गरिएको हो ।

हुन्डाई बोल्डरको डिजाइन निकै बलियो र आकर्षक देखिन्छ। यसको बक्सी आकारको डिजाइन र लिक्विड टाइटेनियम फिनिशले यसलाई प्रिमियम र मजबुत लुक दिएको छ । गाडीमा ३७ इन्चका ठूला टायरहरू जडान गरिएको छ । पछाडि स्पेयर टायर पनि राखिएको छ, जसले लामो अफ-रोड यात्रामा थप सुविधा दिन्छ।

सो गाडीको ग्राउन्ड क्लियरेन्स उच्च राखिएको छ, जसले गर्दा असमान सडक वा ढुङ्गामा गाडीको तल्लो भाग ठोक्किने जोखिम कम हुन्छ । बोल्डरलाई पानीयुक्त क्षेत्र पार गर्न सक्ने गरी डिजाइन गरिएको छ, जसका कारण यो गहिरो नदी वा बाढीग्रस्त सडकमा पनि सहज रूपमा चलाउन सकिन्छ । साथै, आपतकालीन अवस्थाका लागि टो हुक पनि उपलब्ध गराइएको छ।

गाडीको ढोकाको डिजाइन पनि फरक प्रकारको छ । पछाडिका ढोकाहरू अगाडिको विपरीत दिशामा खुल्ने भएकाले भित्र पस्न र बाहिर निस्कन सजिलो हुन्छ। पछाडिको झ्याल बटन थिच्ने बित्तिकै पूर्ण रूपमा तल झर्ने सुविधा दिइएको छ । रातको समयमा अँध्यारो क्षेत्रमा यात्रा गर्दा सहजता दिन छतमा लामो लाइट बार जडान गरिएको छ। साथै, छतमा सामान राख्नका लागि विशेष र्‍याक पनि उपलब्ध छ।

​गाडीको इन्टेरियर निकै सरल बनाइएको छ । यसमा टचस्क्रिनको सट्टा भौतिक बटन र नबहरू राखिएको छ । यसमा फोल्ड हुने टेबल र बलिया ह्यान्डल पनि छ । माथिल्लो झ्यालहरू सफारी शैलीमा खुल्ने भएकाले बाहिरी दृश्य सजिलै अवलोकन गर्न सकिन्छ।