अब शाहरुख खान होइन, हार्दिक पाण्ड्या हुन्डाईको नयाँ ब्रान्ड एम्बेसडर

हुन्डाई भारतमा आएदेखि नै बलिउड कलाकार शाहरुख खान हुन्डाई कारको ब्रान्ड एम्बेसडर बनेका थिए । तर अब कम्पनीले आफ्नो नयाँ कम्प्याक्ट एसयूभीका लागि नयाँ ब्रान्ड एम्बेसडर सार्वजनिक गरेको छ । जुलाई १० मा लन्च हुन लागेको हुन्डाई एक्स्टरलाई अब क्रिकेटर हार्दिक पाण्ड्याले अनावरण गर्ने भएका छन् ।

हार्दिक पाण्ड्या हुन्डाई कारको विज्ञापनमा पनि देखिने भएका छन् । कम्पनीका सीओओ तरुण गर्गले पनि यसको पुष्टि गरेका छन् । उनले पाण्ड्या भारतीय क्रिकेट टोलीका सबैभन्दा छिटो उदाउँदो खेलाडीमध्ये एक भएको र युवा पुस्तामा पनि निकै लोकप्रिय रहेको बताए । हुन्डाईको ध्यान अब नयाँ पुस्ता लक्ष्यित हुने पनि उनले स्पष्ट पारेका छन् ।

हुन्डाईले जारी गरेको प्रेस विज्ञप्तिमा पाण्ड्याले यो प्रोजेक्टलाई लिएर निकै उत्साहित भएको बताएका छन् । पाण्ड्याले यो विश्वस्तरको उत्पादन भएको र यसलाई युवा पुस्ताले मन पराउने बताए ।

हुन्डाईले एक्स्टर १० जुलाईमा लन्च गर्ने भएको छ । यसको प्रत्यक्ष प्रतिस्पर्धा टाटा पन्च, निसान म्याग्नाइट, रेनो काइगर र सिट्रोन सी३ सँग हुनेछ । एक्स्टरमा कम्पनीले १.२ लिटर एस्पिरेटेड पेट्रोल इन्जिन समावेश गरेको छ । सो इन्जिनले ८२ बीएचपीको पावर र ११३ एनएम टर्क उत्पादन गर्छ । कारमा ५ स्पिड म्यानुअल र ५ स्पिड अटोमेटिक गियरबक्सको विकल्प छ ।