हुन्डाईले बन्द गर्यो सेन्ट्रो ह्याचव्याकको उत्पादन

हुन्डाई मोटर्सले भारतमा सेन्ट्रो ह्याचव्याकको उत्पादन बन्द गरेको छ । इन्ट्रि लेवल ह्याचव्याकमा निकै नै लोकप्रिय मानिएको यो कार सन् १९९८ देखी भारतीय बजारमा उपलब्ध रहँदै आएको थियो । सन् २०१४ सम्म पहिलो जेनेरशन सेन्ट्रो बिक्री हुँदै आएको भारतीय बजारमा त्यसपछि भने यसको उत्पादन बन्द गरिएको थियो । पछि सन् २०१८ मा नयाँ डिजाइनका साथ उत्पादन शुरु भएको यो कारलाई इन्ट्रि लेवल ह्याचव्याक सेग्मेन्टमा प्रिमियम कार मानिँदै आइएको थियो । यो नयाँ मोडलले त्यसअघिको इओन ह्याचव्याकलाई प्रतिस्थापन गरेको थियो ।

बजेट सेग्मेन्टको यो कारमा हुन्डाइले रियर एसी भेन्ट र टचस्क्रिन इन्फोटेन्मेन्ट सिस्टम समेत उपलब्ध गराएको थियो । नयाँ सेन्ट्रो लन्च भएको सुरुवाती समयमा निकै राम्रो संख्यामा बिक्री भएपनि त्यसपछि भने यसको बिक्री खस्किदै गएपछि कम्पनीले यो ह्याचव्याकको उत्पादन पुन बन्द गर्ने निर्णय लिएको हो ।

सन् २०१८ यता १ लाख ५० हजार युनिट बिक्री भएको यो कारको बिक्री पछिल्लो समय मासिक २ हजार युनिटमा सिमित वनिरहेको छ । साना एसयुभीको बढ्दो लोकप्रियता र सबै कारमा ६ वटा एयरव्याग अनिबार्य गर्ने सरकारी निर्णयले समेत यो कारको बिक्री र मूल्यमा प्रभाव पार्ने देखेपछि हुन्डाइले सेन्ट्रोको उत्पादन भारतमा बन्द गर्ने निर्णय लिएको हो ।

सेन्ट्रो नेपाली बजारमा समेत निकै नै रुचाइएको ह्याचव्याक कार हो । यसको पहिलो जेनेरेशन मोडल कुनै समय नेपाली बजारमा सर्बाधिक बिक्रि हुने मोडलमा पर्ने गरेको थियो । पछि आएको नयाँ मोडलले भने नेपाली ह्याचव्याक पारखीको मन जित्न सकिरहेको थिएन । यो कार यहि सेग्मेन्टका अन्य ब्रान्डको तुलनामा धेरै नै महंगो भएर आएको थियो ।