चाइनिज बजारमा हस्कभर्ना भिट्पिलेन जस्तै फेकन टीटी २५० बाइक

हस्कभर्नाको क्याफे रेसर बाइक भिट्पिलेन जस्तै स्टाइलमा चाइनिज कम्पनी एफके मोटर्सले फेकन टीटी २५० ल्याएको छ । यसमा २५० सीसीको सिंगल सिलिन्डर इन्जिन छ, जसमा लिक्विड कुल्ड सिस्टम छ ।

हस्कभर्ना बाइक जस्तै यो बाइकको मिटर कन्सोल, स्टिल फ्रेम, यूएसडी फोर्क र समग्र स्टाइलमा धेरै समानता छ । यद्यपि यसमा सिंगल साइडेड स्विङग्राम जस्ता फरक विशेषता पनि रहेका छन् ।

रोचक कुरा के छ भने फेकन टीटी २५० को इन्जिन झेजियाङ चुङफेङले बनाएको हो, जुन चाइनिज अटोमोबाइल ब्रान्ड सीएफमोटोको प्यारेन्ट कम्पनी हो । सीएफमोटो र केटीएमको धेरै कुरामा सहकार्य छ । हस्कभर्ना ब्रान्ड केटीएमकै स्वामित्वमा रहेको छ । त्यसैगरी हालै सम्पन्न बेइजिङ मोटर शोमार्फत हस्कभर्ना ब्रान्ड चाइनिज बजारमा प्रवेश गरेको छ ।

यी सबै तथ्य हुँदाहुँदै पनि विभिन्न प्रतिष्ठित अन्तर्राष्ट्रिय ब्रान्डहरुलाई चाइनिज बजारमा सहज भने छैन । धेरै चाइनिज कम्पनीहरुले यसरी प्रतिष्ठित ब्रान्डका मोटरसाइकल नक्कल गरी बिक्री गरिरहेका छन् ।

पछिल्लो समयमा रोयल इन्फिल्ड हिमालयन जस्तै ह्यानवे जी३० बनेको छ । यो भन्दा पहिले देखि नै केटीएम ड्युक, पल्सर २२०एफ, बीएमडब्ल्यु एस१०००आरआर, यामाहा आर६, डुकाटी प्यानिगेल आदि बाइक दुरुस्त रुपमा नक्कल गरी चाइनिज बजारमा बिक्री भइरहेका छन् ।

यस्ता बाइकहरु प्रतिष्ठित कम्पनीका बाइक भन्दा निकै नै सस्तो मूल्यमा बिक्री भइरहेका हुन्छन् ।