होन्डाले भारतको टाटा टेक्नोलोजीसँग मिलेर सवारी साधन प्लेटफर्म विकास गर्ने, लागत घटाउन सहयोग पुग्ने

जापानी अटो निर्माता कम्पनी होन्डाले इलेक्ट्रिक तथा हाइब्रिड र इलेक्ट्रिफाइड सवारीसाधनको विकास लागत घटाउने रणनीतिअन्तर्गत भारतीय टाटा समूहअन्तर्गतको टाटा टेक्नोलोजीसँग सहकार्य गर्ने भएको छ। होन्डाले आफ्ना केही गाडीमा प्रयोग हुने नयाँ सवारी प्लेटफर्मको विकाससम्बन्धी काम टाटा टेक्नोलोजीलाई दिने भएको हो। एसिया तथा अन्य क्षेत्रका बजारमा बिक्री हुने होन्डाका केही मोडल यही प्लेटफर्ममा आधारित हुने बताइएको छ।

होन्डाले प्लेटफर्म विकासमा कुनै भारतीय कम्पनीसँग सहकार्य गर्न लागेको यो पहिलोपटक भएको बताइएको छ। यद्यपि, उक्त प्लेटफर्ममा विकास हुने मोडलहरू उत्तर अमेरिकामा बिक्री गरिने छैनन्।

अटोमोबाइल, एरोस्पेस तथा औद्योगिक क्षेत्रमा इन्जिनियरिङ र सूचना प्रविधिसम्बन्धी सेवा प्रदान गर्दै आएको टाटा टेक्नोलोजीले होन्डासँगको सहकार्य पुष्टि गरेको छ। कम्पनीका प्रतिनिधिले विश्वका प्रमुख अटो निर्माता कम्पनीहरूले अहिले तीव्र विकास र प्रतिस्पर्धी लागत हासिल गर्न रणनीतिक साझेदारसँग सहकार्य बढाइरहेको बताएका छन्।

होन्डाका प्रवक्ताले पनि भविष्यमा प्रतिस्पर्धात्मक क्षमता बढाउने रणनीतिअन्तर्गत बाह्य कम्पनीसँग सहकार्यका विभिन्न सम्भावनालाई निरन्तर मूल्यांकन गरिरहेको बताएका छन्।

पछिल्लो समय होन्डाले विद्युतीय सवारी विकासमा ठूलो खर्च व्यहोर्नुपरेको छ। कम्पनीले गत मार्चमा उत्तर अमेरिका र जापानमा बिक्री गर्ने तयारी गरिएका तीनवटा विद्युतीय सवारीको विकास रद्द गर्ने निर्णय गरेको थियो। यससँगै आपूर्तिकर्तालाई क्षतिपूर्ति तथा अन्य खर्चसमेत जोडिँदा मार्च २०२७ मा समाप्त हुने चालु आर्थिक वर्षमा होन्डाले ५२० अर्ब जापानी येन अर्थात करिब ३.२९ अर्ब अमेरिकी डलर घाटा व्यहोर्ने प्रक्षेपण गरेको छ।

जापानी येन कमजोर हुँदा कम्पनीको नाफामा सुधार देखिए पनि विद्युतीय तथा अन्य सवारीको विकासमा लाग्ने उच्च लागत भने होन्डाका लागि अझै चुनौतीका रूपमा रहेको छ। यही कारण कम्पनीले नयाँ प्रविधि र प्लेटफर्म विकासमा बाह्य साझेदारको विशेषज्ञता प्रयोग गर्दै लागत र विकास समय दुवै घटाउने रणनीति अघि सारेको देखिन्छ।

होन्डाले पछिल्ला वर्षमा विद्युतीय सवारीतर्फ ठूलो लगानी गर्दै आएको भए पनि विश्व बजारमा ईभीको माग, विकास लागत र प्रतिस्पर्धाको बदलिँदो अवस्थाअनुसार आफ्नो रणनीति पुनःसमायोजन गरिरहेको छ। भारतीय कम्पनीसँग प्लेटफर्म विकासमा गरिएको यो सहकार्यले होन्डाले आगामी दिनमा कम लागतमा विश्व बजारका लागि इलेक्ट्रिफाइड मोडल विकास गर्ने रणनीति अपनाइरहेको संकेत गरेको छ।