प्रोडक्ट रेन्ज बढाउँदै होन्डा, क्रुजर सेग्मेन्ट पछि अब पालो एड्भेन्चर र रेट्रो लुकको

जापनिज टु ह्विलर कम्पनी होन्डाले पछिल्लो समय प्रोडक्ट रेन्ज थप गर्दै लगेको छ । यसअघि डेली कम्युट, टुरिङ र स्पोर्ट बाइक उत्पादन गर्दै आइरहेको कम्पनीले पछिल्लो समय क्रुजर, एड्भेन्चर र रेट्रो अर्थात स्क्र्याम्ब्लर लुकका बाइकको उत्पादन तथा बिक्री बितरणमा समेत जोड दिन थालेको छ । होन्डाले आफ्नो ब्रान्डमा बिश्वास गर्ने राइडरलाई इन्गेज गराइराख्न पनि नयाँ रेन्ज थप गर्दै लगेको हो ।

प्रोडक्ट रेन्जलाई व्यापकता दिने होन्डाको अभियान अन्तर्गत क्रुजर सेग्मेन्टको सीबी हाइनेस ३५० ले कारोबार थालिसकेको छ । भारतमा निर्मित यो मोटरसाइकलले यो सेग्मेन्टमा रुचि राख्ने राइडरलाई आकर्षित गर्न थालिसकेको छ । केही समयअघिमात्र नेपाली बजारमा समेत भित्रिएको यो बाइकको छोटो समय अवधिमै स्टक सोल्ड आउट भएको थियो । परम्परागत प्रतिस्पर्धी रोयल इन्फिल्ड र केही बर्ष अघिमात्र लन्च गरिएको जावा ब्रान्डलाई टक्कर दिने गरी यसको बिक्री थालिएको थियो ।

क्रुजर सेग्मेन्टलाई बजारमा उतारेर चर्चामा आएको होन्डाले पछिल्लो समय रेट्रो लुकको नयाँ बाइक भित्र्याउने तयारी थालेको छ । ३५० सीसी क्षमताको आरएस मोडललाई अबको केही दिनभित्रै नेपाली बजारमा उतारिसक्ने आधिकारिक बितरक स्याकार ट्रेडिङ कम्पनीले जनाएको छ ।

त्यसेगरी कम्पनीले भारतीय प्लान्टमा सस्तो मूल्यको एड्भेन्चर अर्थात डर्ट बाइक उत्पादन गर्ने गरी केही दिन पहिलेमात्र नयाँ बाइकको प्याटेन्ट दर्ता गराएको छ । यो सेग्मेन्टमा कम मूल्यका मोटरसाइकलले बजार लिन थालेपछि प्रतिस्पर्धी ब्रान्डलाई टक्कर दिने रणनीति अनुरुप कम्पनीले भारतीय प्लान्टबाट नयाँ बाइक उत्पादन गर्ने तयारी थालेको हो । हाल कारोबार भैरहेको होन्डा हर्नेट २.० मा आधारित भई होन्डा एनएक्स २०० मोडलको बाइक उत्पादन गर्ने कम्पनीले जनाएको छ । यो बाइक उत्पादन भई भारतमा लन्च भएपछि नेपाली बजारमा समेत भित्रिनेछ । यसले हाल कारोबार भैरहेको यही सेग्मेन्टको एक्सआर मोडललाई प्रतिस्थापन गर्ने देखिन्छ । यो बाइक हाल चीनबाट आयात भैरहेको छ ।

पावरफुल इन्जिन, उच्चतम पावर तथा पर्फमेन्स र इन्धन किफायती विशेषताका कारण होन्डाका टु ह्विलर विश्वभर लोकप्रिय मानिन्छन् । नेपाली बजारमा होन्डाका स्कुटरका साथै साइन, युनिकर्न, सीबी हर्नेट र एक्सआर मोडलका मोटरसाइकल बढी लोकप्रिय छन् । बिगत लामो समयदेखि टु ह्विलर बजारमा होन्डाले अलग छाप छाड्न सफल बनेका कारण नयाँ प्रोडक्ट रेन्जलाई समेत नेपाली राइडरले सहजै विश्वास गर्ने अवस्था देखिन्छ ।