होन्डाले ल्याउने भयो प्रिमियम बाइक होन्डा हाइनेस सीबी५००

होन्डाले रोयल इन्फिल्ड इन्टरसेप्टर ६५०सँग प्रतिस्पर्धा गर्नको लागि प्रिमियम बाइक लन्च गर्ने भएको छ । होन्डाले १६ फेब्रुअरीमा होन्डा हाइनेस सीबी५०० प्रिमियम बाइक लन्च गर्ने आधिकारिक रुपमा जानकारी दिएको छ ।

होन्डाले केही दिन पहिले लन्च गरेको हाइनेस सीबी३५० ले निकै नै चर्चा पाएको छ । यसबाट हौसिएर होन्डाले यसैमा आधारित अर्को बाइक बजारमा ल्याउने तयारी गरेको बुझ्न सकिन्छ ।

कम्पनीले जारी गरेको टिजर इमेजमा नयाँ प्रिमियम बाइक हाइनेस सीबी५०० बाइक पावरफुल देखाइएको छ । होन्डाले क्रुजर बाइक पनि लन्च गर्ने जानकारी दिएको थियो । सोही अवसरमा कम्पनीले होन्डा हाइनेस सीबी५०० बाइकमा आधारित स्क्र्याम्बलर कन्सेप्ट मोडल पनि लन्च गर्ने सम्भावना रहेको छ ।

नयाँ हाइनेस सीबी५०० बाइक कम्पनीको बिग विंग डिलरशिपबाट बिक्री गरिनेछ । कम्पनीको टिजर अनुसार सो बाइकको टेलल्याम्प, आर इन्डिकेटर्स र टायरमा निकै परिवर्तन देख्न सकिन्छ ।

होन्डाको सो बाइकले रोयल इन्फिल्डको इन्टरसेप्टर ६५० र कन्टिनेन्टल जीटी ६५०सँग प्रतिस्पर्धा गर्नेछ । सो बाइकको मूल्य ३ लाख देखि ३ लाख ५ हजार भारु हुने अनुमान गरिएको छ ।