होन्डा हाइनेस सीबी ३५० डीएलएक्स सोल्ड आउट, अब बुकिङ गर्नेले एक महिना पर्खिनु पर्ने

काठमाडौं – नेपाली बजारमा हालै भित्रिएको होन्डाको हाइनेस सीबी ३५० बाइकको स्टक सकिएको छ । नेपाली बजारका लागि पहिलो पटक भित्र्याइएको सबै बाइकको स्टक सकिएको नेपालका लागि आधिकारिक वितरक स्याकार ट्रेडिङले जनाएको छ ।

होन्डा हाइनेस सीबी ३५० का दुई भेरिएन्ट मध्ये नेपाली बजारमा डीएलएक्स भेरिएन्ट बिक्रीका लागि उपलब्ध गराइएको छ । लकडाउन केही खुकुलो हुन थालेको समयमा यो बाइक नेपाली बजारमा भर्चुअल रुपमा लन्च गरिएको थियो । यसको मूल्य ७ लाख ५० हजार रुपैयाँ तोकिएका थियो र लकडाउनकै बीचमा बुकिङ गर्नेका लागि ५० हजार छुट उपलब्ध गराइएको थियो ।

अब भने यो बाइक बुकिङ गर्ने ग्राहकले आगामी अगस्ट महिना सम्म पर्खिनु पर्ने कम्पनीको भनाइ छ । आकर्षक रेट्रो लुक्स, ३५० सीसीको इन्जिन र मोडर्न फिचर्सले गर्दा यो बाइक सबै उमेरका बाइकरहरु माझ लोकप्रिय बन्न सफल भएको छ ।

३००० आरपीएममा ३० एनएम टर्क र ५५०० आरपीएममा २१.०७ पीएसको अधिकतम पावर उत्पादन गर्न सक्ने यस बाइकमा प्रतिस्पर्धी बाइकहरुमा उपलब्ध नभएका रियल टाइम माइलेज, एभरेज माइलेज र डिस्ट्यान्स टु एम्प्टी सूचित गर्ने डिजिटल कन्सोल, रिङ टाइप विंकर सहितको एलईडी हेडल्याम्प र टेलल्याम्प, एसिस्ट एन्ड स्लिपर क्लच, डिजिटल मिटर आदि फिचर यसमा उपलब्ध छन् ।

नेपाली बजारमा प्रतिवर्ष करिव ३ हजार क्रुजर बाइक बिक्री हुने गरेको र यो वर्ष करिव १ हजार हाइनेस सीबी ३५० बिक्री गर्ने कम्पनीको लक्ष्य रहेको स्याकार ट्रेडिङका म्यानेजिङ डाइरेक्टर सौरभ ज्योतिले बताए ।