१०० दिनमा २० हजार होन्डा एलिभेट बिक्री, नेपालमा छैन चर्चा

होन्डाले भारतमा आफ्नो कम्प्याक्ट एसयूभी एलिभेट १०० दिनभित्र २० हजार बढी बिक्री गरेको दाबी गरेको छ ।

कम्पनीका अनुसार पछिल्लो तीन महिनामा एलिभेटले होन्डाको कुल बिक्रीमा ५० प्रतिशतभन्दा बढी हिस्सा ओगटेको छ । सो एसयूभीको माग बढेसंगै होन्डाको भारतमा बिक्री समेत अघिल्लो बर्षको सोही अबधीको तुलनामा ११ प्रतिशतले बृद्धि भएको जनाइएको छ ।

भारतमा बिक्री बढेपनि नेपालमा भने होन्डाको यो नयाँ एसयूभीले कुनै चर्चा बटुल्न सकेको छैन । विगतदेखी नै प्यासेन्जर कार सेग्मेन्टमा बजार लिन नसकेको होन्डाको यो नयाँ एसयूभी ईभीको लोकप्रियतासंगै झन ओझेलमा परेको हो ।

एलीभेटमा १.५ लिटर, ४–सिलिन्डर पेट्रोल इन्जिन जडान गरिएको छ । जसको पावर ११९ बीएचपी र टर्क १४५ एनएम रहेको छ । यो ६–स्पीड म्यानुअल र ७–स्पीड डिसीटी ट्रान्समिसनको विकलप्मा उपलब्ध रहँदै आएको छ ।

एलिभेटले हुन्डाई क्रेटा, किया सेल्टोस, फक्सवागन टाइगुन, स्कोडा कुशाक र मारुती ग्रान्ड भिटारा लगायत एसयूभीसंग प्रतिस्पर्धा गर्दै आएको छ । होन्डा एलिभेट नेपालमा कुल ८ भेरिएन्टमा उपलब्ध रहेको छ । जसको मूल्य ५६ लाख ३५ हजारदेखी ७९ लाख ४४ हजारसम्म निर्धारण गरिएको छ ।