होन्डाले सार्वजनिक ग-यो नयाँ एसयूभी ‘एलिभेट’

होन्डाले भारतमा नयाँ एसयूभी ‘एलिभेट’ ग्लोबल डेब्यु गरेको छ । बजारमा पहिले उपलब्ध होन्डाका सीआर–भी र बीआर–भी जस्तै यो एसयूभी सेगमेन्टको अर्को सवारी साधन हुनेछ ।

आगामी जुलाई देखि यसको बुकिङ प्रारम्भ हुनेछ भने मूल्य पनि त्यही बेला नै सार्वजनिक गरिने छ । यद्यपि यसको मूल्य ११ लाख भारु देखि प्रारम्भ हुने अनुमान गरिएको छ ।

होन्डा एलिभेट ४,३१२ एमएम लामो र १,६५० एमएम उचाई भएको छ भने ह्विलबेस २,६५० एमएम छ । त्यसैगरी यसको बुट स्पेस ४५८ लिटर छ भने ग्राउन्ड क्लियरेन्स २२० एमएम छ ।

होन्डा एलिभेटको अघिल्लो भागमा होन्डा लोगो सहित फ्ल्याट नोज छ । चंकी एसयूभी लुक दिनका लागि यसको साइडमा फ्लेयर्ड ह्विल आर्च छ । विन्डो लाइन सी–पिलर तिर केही माथि उठेको छ भने १६ इन्चको अलोय ह्विल छ ।

पछिल्लो भागमा रियर विन्डो र र्याप अराउन्ड टेललाइट छ भने नम्बर प्लेटका लागि ठूलो टेलगेट छ ।

भित्री भागमा ड्यासबोर्डको बीचमा १०.२५ इन्चको फ्रि–स्ट्यान्डिङ टचस्क्रिन इन्फोटेनमेन्ट टचस्क्रिन छ । त्यसैगरी सिंगल–पेन सनरुफ र एडीएएस सिस्टम समेत उपलब्ध छ ।

ग्लोबल स्मल कार प्लेटफर्ममा बनेको होन्डा एलिभेटमा १.५ लिटर पेट्रोल इन्जिन छ, जसले १२१ एचपी पावर र १४५ एनएम टर्क जेनेरेट गर्छ । ६–स्पिड म्यानुअल ट्रान्समिसन वा सीभीटीमा उपलब्ध यो कार भविष्यमा हाइब्रिड भर्सनमा समेत आउने छ भने करिव ३ वर्ष भित्र इलेक्ट्रिक भर्सनमा समेत आउने बताइएको छ ।

होन्डा एलिभेटले हाल बजारमा उपलब्ध हुन्डाई क्रेटा, किया सेल्टोस, फक्सवागन टाइगुन, स्कोडा कुशाक, सुजुकी ग्रान्ड भिटारा आदि एसयूभीसँग प्रतिस्पर्धा गर्नेछ ।