ड्र्याग रेस टाइमर र सिंगल च्यानल एबीएससहित हिरो एक्सट्रिम १६०आर टुभी बाइक लन्च

हिरो मेटोकर्पले भारतीय बजारमा हिरो एक्सट्रिम १६०आर टुभीको अपडेटेड संस्करण लन्च गरेको छ । कम्पनीले यो भन्दा अघि हिरो एक्सट्रिम १६०आर फोरभी मोडल लन्च गरेको थियो ।

अपडेटपछि कम्पनीले सो बाइकको मूल्य १ लाख ११ हजार भारु राखेको छ । अब सो बाइकमा ड्र्याग रेस टाइमर, सिंगल च्यानल एबीएस, टेल लाइट र एक्सट्रिम १६०आर फोरभी जस्ता सिंगल पीस सिट फिचर उपलब्ध छ । सो बाइकले बजाज पल्सर एन१५० र यामाहा एफजेड रेन्जका बाइकसँग प्रतिस्पर्धा गर्नेछ ।

हिरो एक्सट्रिम १६०आर टुभी कालो रङगको सिङगल भेरिएन्टमा मात्र उपलब्ध छ । हिरोले अब स्प्लिट सिट हटाएर आरामदायी सवारीका लागि सिंगल-पीस सिट राखेको छ। यसको अगाडि एलईडी हेडलाइट र डेटाइम रनिङ लाइट उपलब्ध छ । कम्पनीले नयाँ एक्सट्रिम १६०आर टुभीमा नयाँ रियर प्यानल र नयाँ टेललाइट डिजाइनको साथ नयाँ टेल सेक्शन दिएको छ ।

टेललाइटमा इमरजेन्सी स्टप संकेत पनि उपलब्ध छ । बाइकमा इन्स्ट्रयुमेन्ट कन्सोलमा ड्र्याग टाइमर पनि दिइएको छ, जसमार्फत बाइकको गति नाप्न सकिन्छ। ब्रेकिङको लागि बाइकको अगाडि सिंगल च्यानल एबीएस र पछाडि ड्रम ब्रेकको साथ डिस्क ब्रेक उपलब्ध छ । बाइकमा १७ इन्च अलोय ह्विल समावेश छ जसमा अगाडि १००/८० ट्युबलेस टायर र पछाडि १३०/७० ट्युबलेस टायर छ । सिटको उचाइ ७९५ एमएम र तौल १२ लिटरको ट्याङ्कीको साथ १४५ किलो छ ।

बाइकको इन्जिनमा कुनै परिवर्तन गरिएको छैन । यसमा १६३.२ सीसी सिंगल-सिलिन्डर आयल-कूल्ड इन्जिन छ, जसले ८५०० मा १५ एचपी पावर र ६५०० आरपीएममा १४ एनएमको टर्क जेनेरेट गर्छ । सो इन्जिन ५ स्पिड गियरबक्ससँग ट्युन गरिएको छ । बाइक ओबीडी २ अनुरूप छ र ई२० पेट्रोल (२० प्रतिशत इथेनोल मिक्स पेट्रोल) मा चल्न सक्षम छ ।