नेपाल भित्रियो हिरो एक्सपल्स २०० ४भी : एक्सपल्स २०० भन्दा करिव ८० हजार महंगो हुने

काठमाडौं – नेपाली बजारमा केही समय पछि बिक्री गर्ने तयारीका साथ हिरो एक्सपल्स २०० ४भी भित्रिएको छ । नेपालका लागि आधिकारिक वितरक नेपाल जनरल मार्केटिङ प्रालिले हाल परीक्षणको लागि यो मोटरसाइकल भित्र्याएको र फागुनको मध्यदेखि यसको औपचारिक बिक्री प्रारम्भ गरिने बताएको छ ।

हाल नेपाली बजारमा उपलब्ध हिरो एक्सपल्स २०० निकै नै लोकप्रिय मोटरसाइकल हो । यसको अपडेट भर्सनको रुपमा भारतीय बजारमा यो मोटरसाइकल केही समय यता बिक्री हुँदै आएको छ । बढ्दो मागका कारण बीचमा यसको उत्पादन नै प्रभावित भएको थियो र पछि केही मूल्य वृद्धिका साथ फेरि बजारमा उपलब्ध गराइएको थियो ।

पहिले अंग्रेजी नयाँ वर्षको सुरुवातमै यसलाई भित्र्याउने तयारी भए पनि विविध कारणले हालै मात्र यो मोटरसाइकल भित्रिएको छ ।

हाल नेपाली बजारमा एक्सपल्स २०० को मूल्य ४ लाख ३ हजार ५ सय रुपैयाँ छ । नेपाली बजारमा अब उपलब्ध हुने एक्सपल्स २०० ४भीको मूल्य पछि नै तोकिने छ । यद्यपि यसको मूल्य करिब ४ लाख ८० हजारको हाराहारी हुने अनुमान गर्न सकिन्छ । भारतमा यसको मूल्य १ लाख ३० हजार भारु छ ।

नयाँ एक्सपल्स २०० ४भीले १८.८ पावर र १७.३५ एनएम टर्क जेनेरेट गर्छ, जुन हाल प्रचलित एक्सपल्स भन्दा बढी हो । हालको स्ट्यान्डर्ड एक्सपल्स २०० ले १७.८ बीएचपी पावर र १६.४५ एनएम टर्क जेनेरेट गर्छ ।

इन्ट्री लेवलको सो एड्भेन्चर मोटरसाइकललाई पावरफुल बनाउनका लागि अन्य धेरै अपडेट समेत गरिएको छ । यसमा अपडेटेड ७ फिन आयल कुलर र सुधारिएको ट्रान्समिसन प्रयोग गरिएको छ । त्यसैगरी एलईडी हेडल्याम्प समेत छ ।

यो मोटरसाइकलमा ब्लुटुथ सपोर्ट र टर्न बाई टर्न नेभिगेसन सहितको फुल डिजिटल इन्स्ट्रयुमेन्ट क्लस्टर, गियर इन्डिकेटर, सिंगल च्यानल एबीएस, लङ ट्राभल सस्पेन्सन, ड्युअल परपोज टायर आदि उपलब्ध छ ।