यसकारण राइडरको रोजाइमा पर्न सक्छ हिरो एक्सपल्स २०० फोरभी

हिरो एक्सपल्स एड्भेन्चर मोटरसाइकल प्रेमीमाझ एकदमै लोकप्रिय मोटरसाइकल हो । नेपालमा मात्र नभई भारतीय बजारमा समेत यो मोटरसाइकलमा रुची राख्ने राइडरको संख्या बढिरहेको छ । भारतमा कारोबार थालेको लामो समयपछि नेपाल भित्रिएको यो मोटरसाइकल अहिले यो सेग्मेन्टमा सर्बाधिक बिक्री हुने मोडलका रुपमा स्थापित बनेको छ ।

नेपाली बजारमा यसको २०० र २०० टी गरी कुल दुई मोडल उपलब्ध रहँदै आएपनि २०० मोडल एकदमै सफल बनिरहेको छ । सोही मोडलको नयाँ भर्सन फोरभी परिस्कृत डिजाइन र पावर तथा पर्फमेन्स सहित नेपाल भित्रिएपछि अहिले यो मोटरसाइकलका बारेमा जानकारी लिन चाहने राइडहरुक बढिरहेका छन् ।

मोटरसाइकलमा लामो यात्रा तय गर्न चाहने राइडरको रोजाइमा पर्न सफल यस्ता एड्भेन्चर वाइक अफरोडका लागी समेत उपयोगी मानिन्छन् । उच्च ग्राउन्ड क्लिरियन्स, आरामदायी सस्पेन्सन, उच्चतम पावर तथा पर्फमेन्स र बलियो तथा टिकाउ पार्टपूर्जाका कारण एड्भेन्चर मोटरसाइल राइड गर्न चाहने युवा जमात बढिरहेको अबस्थामा एक्सपल्सको २०० फोरभीले यो सेग्मेन्टमा नयाँ बेन्चमार्क खडा गर्न सक्ने देखिएको छ ।

नेपाली बजारमा उपलब्ध प्राय स्थापित ब्रान्डका एड्भेन्चर मोटरसाइकलको मूल्य ८ लाख माथी तय गरिएको अबस्थामा त्यसको ठिक आधा अर्थात ४ लाख ५० हजार रुपैयँमा खरिद गर्न सकिने बिशेषताका कारण पनि यो वाइक सफल हुने देखिन्छ । हाल बजारमा केटिएमसंग एड्भेन्चर २५० र ३९० मोडल, रोयल इन्फिल्डसंग हिमालयन र बेनेलीसंग टिआरके २५१ जस्ता मोडल उपलब्ध छन् । यी बाइकको मूल्य क्रमश ८ लाख २० हजार, १० लाख ९० हजार, ८ लाख ८९ हजार र ८ लाख २५ हजार रुपैयाँ निर्धारण गरिएको छ । यी बाइकमध्ये रोयल इन्फिल्ड हिमालयनमा सबैभन्दा ठूलो इन्जिन दिइएको छ । यो बाइकमा ४११ सिसी क्षमतको इन्जिन जडान गरिएको हो ।

त्यसैगरी केटिएम एड्भेन्चर २५० मा २४८ सिसी र ३९० मा ३७३ सिसी क्षमताको इन्जिन दिइएको छ । बेनेली टिआरकेमा २४९ सिसी क्षमताको इन्जिन जडान गरिएको छ भने हिरो एक्सपल्स २०० मा २०० सिसी क्षमताको बिएस६ इन्जिन दिइएको छ ।

यस्तो छ उपलब्ध फिचर्स र पर्फमेन्स
इन्ट्रि लेभलको एड्भेन्चर वाइक एक्सपल्समा २०० सिसी क्षमताको बिएस६ आयल कुल्ड इन्जिन जडान गरिएको छ । यो मोटरसाइकलको अधिकतम पवार १९.१ पिएस र टर्क १७.३५ एनएम रहेको छ । यो मोटरसाइकलमा हिरो मोटोकर्पले सेग्मेन्टकै उत्कृष्ट कुलिङ सिस्टम उपलब्ध गराएको दाबी गरेको छ ।

साथै यो मोटरसाइकलमा एलइडी हेडलाइट, स्मार्ट फोन कनेक्टिभिटी र कल अलर्ट, टर्न वाई टर्न नेभिगेसन, गियर इन्डिकेटर, इको मोड, डवल ट्रिप मिटर, सिंगल च्यानल एबिएस जस्ता सेग्मेन्ट फस्र्ट फिचर्स दिइएको छ ।

एड्भेन्च टुरका लागी सहज होस भनेर अगाडी १९० एमएम र पछाडी १७० एमएमको लामो सस्पेन्सन दिइएको छ । जसलाई राइडरले आफ्नो आबश्यकता अनुरुप १० तरिकाले एड्जस्ट गर्न सक्नेछन् । साथै अगाडी २१ इन्च र पछाडी १८ इन्चको स्पोक ह्विल, सुधार गरिएको सिट, विन्डसिल्ड, युएसवी चार्जर र -याली किट उपलब्ध गराइएको छ । अफरोडमा यात्रा गर्ने क्रममा यसको इन्जिनलाई ठोक्किनबाट जोगाउँन आल्मुनियम स्किड प्लेट समेत राखिएको छ । यो मोटरसाइकलको ग्राउन्ड क्लिरियन्स २२० एमएम रहेको छ ।