हीरोले सार्बजनिक गर्यो प्लेजर एक्सटेक प्लसको टिजर

हिरो मोटोकर्पले निकट भबिष्यमा सार्बजनिक गर्न लागेको नयाँ स्कुटर प्लेजर एक्सटेक प्लसको टिजर भिडियो सार्बजनिक गरेको छ । उक्त स्कुटर २०२२ को पहिलो त्रैमासभित्र सार्बजनिक गर्ने बुझिएको छ । यसअघिको प्लेजरलाई अपग्रेड गरी नयाँ स्कुटर ल्याउन लागिएको हो । यो स्कुटरमा एलइडी लाइट र ब्लुतुथ कनेक्टिभिटी प्रमुख बिशेषता रहने हिरोले जनाएको छ ।

सार्बजनिक गरिएको उक्त भिडियोमा नयाँ स्कुटरलाई ग्लसी पहेंलो कलरमा समेत देखाइएको छ । यो स्कुटरको ह्विल बेश १२३८ एमएम र ग्राउन्ड क्लिरियन्स १५५ एमएम रहने बताइएको छ । १०६ किलोग्राम तौल भएको यो स्कुटरमा ४.८ लिटर क्षमताको फ्युल ट्यांक दिइएको छ । ११० सिसी क्षमताको इन्जिन जडान गरिने यो स्कुटरमा फ्युल इन्जेक्सन प्रबिधी समेत थप गरिएको छ । यसको अधिकतम पावर ८ बिएपची र टर्क ८.७० एनएम रहनेछ । यो स्कुटरको मूल्य भारतीय बजारमा ६३ देखी ६८ हजार रुपैयाँको बिचमा कायम गरिने अनुमान गरिएको छ ।

भारतमा सार्बजनिक गरिए लगत्तै यो नयाँ स्कुटर नेपाली बजारमा समेत भित्रिनेछ । नेपाली स्कुटर पारखीमाझ यसअघिको प्लेजरले निकै राम्रो प्रभाव पारेका कारण नयाँ मोडल समेत लोकप्रिय बन्ने अनुमान लगाउन सकिन्छ । यद्यपी नेपालको स्कुटर बजारमा पछिल्लो समय १२५ सिसी क्षमताका स्कुटरले राम्रो प्रभाव पारेका कारण नयाँ प्लेजरको बजार कस्तो रहला भनेर यसै भन्न सकिने अबस्था भने देखिदैन ।