इलेक्ट्रिक मोबिलिटीका लागि हिरो मोटोकर्प र गोगोरो बीच साझेदारीको घोषणा

हिरो मोटोकर्प र गोगोरो इंकले भारतमा विद्युतीय गतिशीलता (मोबिलिटी)को दिगो परिवर्तनलाई गति दिनका लागि एक रणनीतिक साझेदारीको घोषणा गरेका छन् । यसले विश्वकै सबैभन्दा ठूलो मोटरसाइकल र स्कुटर निर्माता कम्पनी हिरो र सहरी ब्याट्री स्वापिङ तथा स्मार्ट मोबिलिटी नवप्रर्वतन अर्थात इनोभेसनको क्षेत्रमा विश्वव्यापी अग्रणी कम्पनी गोगोरोलाई एक ठाउँमा ल्याएको छ ।

भारतमा गोगोरोका उद्योगको अग्रणी ब्याट्री स्वापिङ प्लेटफर्म ल्याउन दुवै कम्पनीहरूले संयुक्त लगानीमा ब्याट्री स्वापिङ उद्यम स्थापना गर्नेछन् र हिरोको ब्रान्डमा गोगोरो नेटवर्कद्वारा सञ्चालित हुने विद्युतीय सवारी साधन विकासमा सहकार्य गर्नेछन् ।

नयाँ साझेदारीको बारेमा टिप्पणी गर्दै हिरो मोटोकर्पका अध्यक्ष तथा प्रमुख कार्यकारी अधिकृत डा. पवन मुन्जालले गोगोरोसँगको रणनीतिक साझेदारी मोबिलिटीको भविष्य बन्ने हिरोको भिजन अनुरुप भएको र हिरोको लक्ष्य अर्थात मिसन ‘सिर्जना, सहकार्य र प्रेरणा’ मार्फत जीवन्त तुल्याउन यसले सहयोग गर्ने बताए । यो हिरोको यात्राको अर्को महत्वपूर्ण कोशेढुंगा कायम भएको जानकारी दिए ।

“हामी सहरी गतिशीलता र स्मार्ट सहरहरूको विकासको रूपान्तरणको एक महत्वपूर्ण चरणमा छौं । भारतमा २२ करोड ५० लाख भन्दा बढी ग्यासद्वारा सञ्चालित दुई पाङ्ग्रे सवारी साधन भएको अवस्थामा स्मार्ट र दिगो विद्युतीय यातायात र नवीकरणीय ईन्धनको आवश्यकता छ,” गोगोरो इंकका संस्थापक तथा प्रमुख कार्यकारी अधिकृत होरेस ल्युकले भने, “हीरो–गोगोरो साझेदारीले यी चुनौतीहरूलाई सम्बोधन गर्छ तथा स्मार्ट सवारी साधन उपलब्ध गराउने गोगोरोको अग्रणी औद्योगिक नवप्रवर्तन र गोगोरो नेटवर्कको ब्याट्री स्वापिङयुक्त नवीकरणीय ऊर्जाले हिरोको बजार सबलतालाई लाभ प्रदान गर्नेछ ।”

गोगोरो नेटवर्क एक हाइपर–इफिसियन्ट ब्याट्री स्वापिङ प्लेटफर्म हो जुन फ्रस्ट एन्ड सुलिभानले ‘ग्लोबल स्वापेबल ब्याट्री इलेक्ट्रिक स्कुटर मार्केट’को सन् २०२० मा कम्पनी अफ द इयर अवार्डबाट सम्मानित भएको छ । ३ लाख ७५ हजार भन्दा बढी सवारी चालक (राइडर्स) र २ हजार ब्याट्री स्वापिङ स्टेशनहरूको साथमा गोगोरो नेटवर्कले दैनिक २ लाख ६५ हजार ब्याट्री स्वाप गर्दछ, हाल सम्म यसले १७ करोड ४० लाखभन्दा बढी ब्याट्री स्वाप गरिसकेको छ ।