हिरो, टीभीएस र बजाजको जोड अब इलेक्ट्रिक स्कुटरमा पनि

अहिले विश्व अटो बजार नै इलेक्ट्रिकमय बनिरहेको छ । यस्तो अवस्थामा भारतीय अटो मेकरहरुसमेत इलेक्ट्रिक भेइकल उत्पादनमा आक्रामक बनिरहेका छन् । भारतका अधिकांश फोर ह्विलर उत्पादकहरुले धमाधम ईभी उत्पादन थालिरहेको अवस्थामा टु ह्विलर कम्पनीहरुले समेत यसमा जोडबल लगाउन थालेका हुन् ।

हाल हिरो, टीभीएस र बजाजले इलेक्ट्रिक स्कुटर उत्पादन गरी बिक्री समेत थालिसकेका छन् । यी कम्पनी बाहेक केही स्टार्टअप कम्पनीहरु इलेक्ट्रिक टु ह्विलरमा महत्वकांक्षी योजना सहित लागिपरेका छन् । हाल भारतमा ओला र सिम्पलले इलेक्ट्रिक टु ह्विलर उत्पादनमा विश्वकै ठूलो उत्पादक बन्ने योजनासहित अघि बढिरहेका छन् । यस्तोमा बजाज, हिरो, टीभीएस र होन्डा जस्ता स्थापित कम्पनीले समेत यो सेग्मेन्टमा आफूहरु चुप लागेर नबस्ने संकेत देखाएका हुन् ।

भारतको सबैभन्दा ठूलो टु ह्विलर कम्पनी हिरोले हाल ६ वटा मोडलका इलेक्ट्रिक स्कुटर उत्पादन गरी बिक्री वितरण गर्दै आइरहेको छ । हिरोका यी स्कुटरले बजारमा चर्चा समेत बटुल्दै गएको छ । इलेक्ट्रिक स्कुटरमा हालसम्म पनि हिरो अग्रस्थानमा रहन सफल छ । हिरोका फ्ल्यास, अप्टिमा, फोटोन, एनवाईएक्स र ड्यास स्कुटरको कारोबार हुँदै आइरहेको छ । यी स्कुटरको मूल्य भारतीय बजारमा ४६ हजार देखि ७० हजार भारुसम्म पर्छ ।

हिरोपछि बजाजले चेताक ब्रान्डमा इलेक्ट्रिक टु ह्विलरको उत्पादन थालिसकेको छ । चेताकको अर्बान र प्रिमियम गरी २ भेरिएन्टमा यो स्कुटर उपलब्ध रहँदै आएको छ । जसमध्ये अर्बानको मूल्य १ लाख ४२ हजार र प्रिमियमको १ लाख ४४ हजार भारु निर्धारण गरिएको छ । चेतक ब्रान्डमा थप मोडलका इलेक्ट्रिक स्कुटर र मोटरसाइकल उत्पादन गर्दै जाने बजाजले योजना बनाएको छ ।

त्यसैगरी टीभीएसले समेत स्मार्ट फिचर्स थप गरी आईक्युब नामको इलेक्ट्रिक स्कुटर बिक्री गर्दै आइरहेको छ । यो स्कुटरको मूल्य भारतीय बजारमा १ लाख १० हजार भारु निर्धारण गरिएको छ । आगामी दिनमा थप मोडल उपलब्ध गराउँदै जाने योजना समेत टीभीएसले बनाएको छ ।