हार्टफोर्डको वेबिनार सम्पन्न : सहभागीहरुले पाए घरैमा बाइक सर्भिसिङ गर्ने टिप्स

काठमाडौं – लामो निषेधाज्ञा वा लकडाउनको समयमा धेरै बाइकहरु घरैमा थन्किएका छन् । यो अवस्थामा सामान्य ग्राहकले पनि घरैमा बसेर आफ्नो बाइक वा स्कुटर जस्ता टु ह्विलर सर्भिसिङ वा मर्मत गर्न सकिन्छ ।

तर यसका लागि सर्भिसिङ वा मर्मतका वारेमा सामान्य जानकारी हुनु आवश्यक छ । यही कुरालाई मनन गरी हार्टफोर्ड बाइकको नेपालका लागि आधिकारिक वितरक इग्निसन अटोले हिजो जुममार्फत वेबिनार सम्पन्न गरेको छ ।

सो अवसरमा हार्टफोर्ड ताइवानबाट प्रशिक्षित विशेषज्ञहरुले आवश्यक जानकारी दिनुका साथै सहभागीहरुका विभिन्न जिज्ञासाहरुको समाधान गरेका थिए ।

करिव ७५ जनाको सहभागिता रहेको सो वेबिनारमा हार्टफोर्ड मोटर्स ताइवानको ग्लोबल मार्केटिङ डिपार्टमेन्टका एनिक्स चाङले सबैलाई सहभागिताको लागि धन्यवाद ज्ञापन गरेका थिए ।

हार्टफोर्ड नेपालका सर्भिस म्यानेजर इन्जिनियर मनिष अर्यालले बाइक मर्मतका लागि आवश्यक पक्षहरु र मर्मत गर्ने तरिका वारेमा प्रस्तुतिकरण गरेका थिए । उनले ब्याट्री, इन्धन, फ्युज, स्पार्क प्लग आदिका कारण बाइक स्टार्ट नहुने समस्या र यसको समाधानका लागि गर्नु पर्ने आवश्यक कार्य वारेमा जानकारी प्रस्तुत गरे ।

त्यसैगरी घरैमा आफैले गर्न सकिने आधारभूत सर्भिसिङ र यसको लागि जान्नु पर्ने इन्जिन आयलको प्रकार र ग्रेडको वारेमा जानकारी प्रदान गरे । त्यसैगरी चेन स्पोकेटको वारेमा जान्नु पर्ने कुराहरु र वासिङ गर्दा अपनाउनु पर्ने सावधानी वारेमा समेत जानकारी प्रदान गरे ।

अर्यालले कार्बुरेटरमा हुने समस्या, टायरको वारेमा थाहा पाउनु पर्ने आधारभूत पक्षहरु र अन्य विभिन्न पक्षको वारेमा समेत जानकारी प्रदान गरे ।

वेबिनारमा सहभागीहरुले हार्टफोर्ड र अन्य ब्रान्ड समेतका बाइकको मर्मतका वारेमा सोधेका विभिन्न प्रश्नहरुको उत्तर अर्यालका साथै हेड टेक्निसियन श्रीराम महर्जन र टेक्निसियन राजेन्द्र महर्जनले दिएका थिए ।

हार्टफोर्ड नेपालका सेल्स म्यानेजर समिर महर्जन मोडरेटर रहेको सो वेबिनार निकै नै प्रभावकारी भएको सहभागीहरुले बताएका थिए । आगामी दिनमा समेत यस्तै कार्यक्रमको आयोजना गर्दै जाने कम्पनीको भनाइ छ ।

हार्टफोर्ड ताइवानी कम्पनी हो । हाल नेपाली बजारमा भीआर १५० एच र २२३ एच गरी दुई मोडलका हार्टफोर्ड बाइक इग्निसन अटोले उपलब्ध गराइरहेको छ ।