ओरा ५ को दुई नयाँ भेरियन्ट आउँदै, टिजरमा देखियो झनै स्पोर्टी र आक्रामक

काठमाडौं–ग्रेट वाल मोटर (जीडब्लूएम) को चर्चित ब्रान्ड ओराले आफ्नो लोकप्रिय इलेक्ट्रिक क्रसओभर ओरा ५ का दुई नयाँ भेरियन्ट सार्वजनिक गर्ने तयारी गरेको छ । कम्पनीले ओरा ५ को नयाँ स्पोर्ट र जीटी भेरियन्टको आधिकारिक टिजर सार्वजनिक गरेको छ ।

यस इलेक्ट्रिक क्रसओभरको स्पोर्ट भेरियन्टको बाहिरी बनावटमा ठूलो परिवर्तन नगरिए पनि यसलाई थप आकर्षक र प्रिमियम बनाउन टु–टोन पेन्ट, ठूला र स्टाइलिश एलोय ह्विल्सका साथमा रातो रङको ब्रेक क्यालिपर तथा एडभान्स सेन्सिङका लागि लिडार युनिट जडान गरिएको देखिन्छ ।
त्यसैगरी, जीटी भेरियन्टलाई भने थप आक्रामक र स्पोर्टी देखाउन विशेष एरोडाइनामिक बडी किट प्रयोग गरिएको छ ।

यस भेरियन्टको अगाडि फ्रन्ट स्प्लिटर, पछाडि रियर स्पोइलर र साइडमा आकर्षक स्कर्टहरु दिइएका छन् । साथै, ह्विल, हेडलाइट, ब्रेक र एरो पाट्र्समा दिइएको रातो रङले गाडीलाई थप स्पोर्टी लुक्स दिएको छ ।

जीडब्लूएमका अनुसार यी नयाँ भेरियन्टहरूको डिजाइन र लुक्समा परिवर्तन गरिए पनि प्राविधिक तथा हार्डवेयरमा भने खासै फेरबदल गरिएको छैन ।

नेपाली बजारमा हालैमात्र भित्रिएको ओरा ५ मा ५८.३ किलोवाट आवरको ब्याट्री प्याक र १०० किलोवाट क्षमताको मोटर जडान गरिएको छ । जसको सुरुवाती मूल्य ४७ लाख रुपैयाँ निर्धारण गरिएको छ ।

चिनियाँ बजारमा भने यो ४५.३ किलोवाट आवर ब्याट्री विकल्पमा समेत उपलब्ध छ र दुवै भेरियन्टमा १५० किलोवाट क्षमताको शक्तिशाली मोटर जडान गरिएको छ ।