फरारी सुपरकारसँग प्रतिस्पर्धा गर्ने पहिलो सुपरकार ल्याउँदै ग्रेटवाल मोटर, मूल्य आधा कम

ग्रेटवाल मोटर अर्थात जीडब्लुएमले सन् २०२६ को अन्त्य सम्ममा पहिलो सुपरकार सार्वजनिक गर्ने भएको छ । सो सुपरकार चीनको पहिलो वास्तविक सुपरकार हुने र यसको विकास गत चार पाँच वर्ष पहिले देखि नै भइरहेको छ ।

जीडब्लुएमका चेयरम्यान वेई जियानजुनले सो कुरा बताएको र यसको जानकारी अटो होमले प्रकाशित गरेको छ । उनको नेतृत्वमा अल्ट्रा लक्जरी भेइकल बिजनेस ग्रुप स्थापित गरिएको र यस अनुसार नै सो कार्य भइरहेको बताइएको छ ।

यो वर्षको शुरुमै जिजिन अटो अर्थात कन्फिडेन्स अटोको नाममा ट्रेडमार्क दर्ता भएको जानकारी सामेत अनलाइनमा सार्वजनिक भएको थियो । ग्रेटवाल मोटरले दर्ता गरेको सो ट्रेडमार्कको चर्चा निकै नै भएको थियो । रिपोर्ट अनुसार जिजिन अटो चाहिं ग्रेटवाल ग्रुप अन्तर्गत अल्ट्रा लक्जरी सेगमेन्ट ब्रान्ड हुनेछ, जुन बीवाईडीको याङवाङ जस्तै हुनेछ ।

जीडब्लुएमको ३५औं वार्षिकोत्सवको अवसरमा गत जुलाई महिनामा सो मोडलको झलक सार्वजनिक गरिएको थियो । वाइड फेन्डर र लो स्ट्यान्स सहित कभर गरिएको सो गाडीको मोडलको डिजाइन र पर्फमेन्सको वारेमा भने जानकारी सार्वजनिक गरिएको छैन । यद्यपि जीडब्लुएमका सीटीओ वु हुइजियाओले फरारी एसएफ९० जस्तै मोडलमा कम्पनीले नयाँ सुपरकार विकास गरिरहेको बताएका थिए । यसमा कम्पनीले आफै विकास गरेको ४.०टी ट्विन टर्बो भी८ इन्जिन रहेको र यसमा प्लग इन हाइब्रिड कन्फिगरेसनको इलेक्ट्रिक मोटर रहेको छ । यसले १००० एचपी पावर दिने र शून्य देखि १०० किलोमिटर प्रतिघण्टाको गति ३ सेकेन्डमै लिन सक्ने अनुमान गरिएको छ । यसको टप स्पिड ३५० किलोमिटर प्रतिघण्टा हुनेछ ।

जे भए पनि चिनियाँ बजारमा उपलब्ध भए पश्चात यो सुपरकारले प्रतिष्ठित युरोपियन मोडलहरुसँग प्रतिस्पर्धा गर्न सक्ने अनुमान गरिएको छ । यसको मूल्य करिव २ लाख ८० हजार डलर हुनेछ, जुन फरारी एसएफ९० भन्दा आधा रकम कम हो ।