एउटै प्लेटफर्ममा सबै सवारी विकास गर्न सकिने ‘जीडब्ल्यूएम वान प्लेटफर्म’ लन्च

चीनको अटोमोबाइल निर्माता कम्पनी ग्रेट वाल मोटर्सले विश्वकै पहिलो आर्टिफिसियल इन्टेलिजेन्समा आधारित प्लेटफर्म ‘जीडब्ल्यूएम वान प्लेटफर्म’ लन्च गरेको छ। कम्पनीका अनुसार यही प्लेटफर्ममा आधारित भएर भविष्यका विभिन्न प्रकारका सवारी साधनहरू विकास गरिनेछ ।

जीडब्ल्यूएम वान प्लेटफर्मको सबैभन्दा ठूलो विशेषता भनेको एउटै प्लेटफर्ममा पेट्रोल, डिजेल, इलेक्ट्रिक, हाइब्रिड, प्लग–इन हाइब्रिड तथा हाइड्रोजनबाट चल्ने सवारी साधनहरू निर्माण गर्न सकिने क्षमता हो । यसले कम्पनीलाई बजारको माग अनुसार छिटो र लचिलो रूपमा नयाँ मोडल विकास गर्न सहयोग गर्नेछ।

सो प्लेटफर्ममा ९०० भोल्टको उच्च भोल्टेज प्रविधि प्रयोग गरिएको छ, जसले विद्युतीय सवारी साधनलाई ६ सय किलोवाटभन्दा बढी क्षमतामा छिटो चार्ज गर्न सक्षम बनाउनेछ। यसका साथै हाइब्रिड सवारी साधनका लागि नयाँ २.० लिटर टर्बोचार्ज्ड इन्जिन र ४ स्पिड गियरबक्स पनि समावेश गरिएको छ, जसले कठिन तथा कच्चा सडकमा समेत सशक्त प्रदर्शन दिने कम्पनीको दाबी छ।

ग्रेट वाल मोटर्सले आफ्नो हाइ–फोर हाइब्रिड प्रविधिलाई पनि नयाँ रूप दिएको छ। अपडेट गरिएको सो प्रणालीमा अगाडि र पछाडि दुवै एक्सलमा मोटर जडान गर्न सकिने व्यवस्था गरिएको छ, जसले सवारी साधनलाई अझ राम्रो नियन्त्रण, स्थिरता र शक्ति प्रदान गर्दछ। कम्पनीले भविष्यमा यही प्लेटफर्ममा आधारित डिजेल हाइब्रिड इन्जिनसमेत ल्याउने योजना बनाएको छ।