ग्रान्ड आई१० नियोस फेसलिफ्टको चार भेरिएन्ट नेपाल आउने, यस्तो छ मूल्य

हुन्डाईको लोकप्रिय ह्याचव्याक कार ग्रान्ड १० नियोस फेसलिफ्टको चार भेरिएन्ट नेपाल आउने भएको छ । नेपालका लागि आधिकारिक विक्रेता लक्ष्मी इन्टरकन्टिनेन्टल प्रालिले मूल्य सार्वजनिक गर्दै यो कार नेपाल आउन लागेको जानकारी दिएको हो ।

कम्पनीका अनुसार यसको एरा भेएिन्टको मूल्य २९ लाख ९६ हजार निर्धारण गरिएको छ भने अर्को भेरिएन्ट म्याग्नालाई ३५ लाख ५६ हजार रुपैयाँ पर्छ । यसैगरी म्याग्ना एएमटीको ३७ लाख ९६ हजार निर्धारण गरिएको छ भने टप भेरिएन्ट स्पोर्टजलाई ३७ लाख ५६ हजार पर्छ ।

यो नयाँ मोडलको फ्रन्टमा हुन्डाइले रिडिजाइन गरिएको ग्रिल दिएको छ । कारमा वाई आकारको एलइडी यूनिट पाउन सकिन्छ । भेन्यू फेसलिफ्टमा जस्तै यसको पनि फग ल्याम्प भने हटाइएको छ । कारको रियरमा रिडिजाइन गरिएको टेलगेट सहित नयाँ टेल लाइट दिइएको छ । यसको साइड प्रोफाइलमा भने कुनै परिवर्तन गरिएको छैन ।

यो कारमा नयाँ इन्स्ट्रयूमेन्ट क्लस्टर, ८ इन्चको टचस्क्रिन इन्फोटेन्मेन्ट डिस्प्ले, वायरलेस चार्जिङ, टाइप सी यूएसवी चार्जिङ पोर्ट, क्रुज कन्ट्रोल र टायर प्रेसर मोनिटरिङ लगायत अन्य थुप्रै फिचर पाउन सकिन्छ । कारमा ६ वटासम्म एयरव्याग, एविएस, इविडी, इएससी, रिभ्यू मिरर आइसोफिक्स लगायत सेफ्टि फिचर सामेल गरिएको छ ।

यो नयाँ फेसलिफ्ट मोडलमा यसअघिकै १.२ लिटर पेट्रोल इन्जिनलाई निरन्तरता दिइएको छ । जसको अधिकतम पावर ८३ एचपी र टर्क ११३.८ एनएम रहको छ । यसमा ५ स्पिड म्यानुअल र एएमटी ट्रान्समिसनको विकल्प पाउन सकिन्छ ।