२०० किलोमिटर रेन्ज दिने नयाँ सिटी कार आउँदै

भारतिय ईभी स्टार्टअप कम्पनी जेन्सोल इलेक्ट्रिक भेहिकलले आफ्नो आगामी इलेक्ट्रिक सिटी कारको टिजर सार्वजनिक गरेको छ । कम्पनीले २०२४ मार्चमा आधिकारिक डेब्यू गर्ने तयारी भएको सो सानो कारको टिजर सार्बजनिक गरेको हो ।

सार्बजनिक भएको टिजर भिडियो अनुसार सो कारमा जम्मा दुईवटा मात्र सिट उपलब्ध हुनेछ । साथै यसको लुक्स र डिजाइन निकै आकर्षक र आधुनिक देखिएको छ । कारमा रियर ह्वील सेटअप दिइएको छ ।

इन्टेरियरमा माउन्ट गरिएको टचस्क्रिन इन्फोटेनमेन्ट प्रणाली, म्यानुअल एयर कन्डिसन र साधारण ड्राइभ मोड पाउन सकिने कम्पनीले जनाएको छ । सो नयाँ कारमा चालक सहायता प्रविधि र एआई–आधारित क्लाउड एनालिटिक्स लगायत फिचर उपलब्ध हुनसक्ने सम्भावना देखिएको छ ।

आफ्नो पहिलो विद्युतीय कारमा उपलब्ध हुने प्राविधिक विवरणहरू भने जेन्सोलले सार्बजनिक गरिसकेको छैन । तथापी सो नयाँ कारलाई ८० किलोमिटर प्रतिघण्टाको उच्च गतिमा हाँक्न सकिने र सिंगल चार्जमा २०० किलोमिटर रेन्ज दिने दाबी गरिएको छ ।