नेपालमै सबैभन्दा बढी रेन्ज दिने इलेक्ट्रिक स्कुटर लन्च गर्दै क्लासिक ह्विल्स

काठमाडौं - नेपालमा हाल क्रसफायर र इटालिका मोटोका मोटरसाइकल बिक्री वितरण गरिरहेको क्लासिक ह्विल्स एक्सपोर्ट एन्ड इम्पोर्ट प्रालिले नेपालमा हाल उपलब्ध इलेक्ट्रिक स्कुटर मध्ये सबैभन्दा बढी रेन्ज दिने इलेक्ट्रिक स्कुटर लन्च गर्ने भएको छ । क्लासिक ह्विल्सले ग्यारो ईभी स्कुटर नेपाली बजारमा उपलब्ध गराउने भएको हो ।

विगत ६ महिना देखि नै सो स्कुटर नेपाली सडकमा परीक्षण गरिरहेको र अब अन्य सबै कमजोरी सच्याएर नेपाली बजारका लागि उपलब्ध हुने गरी निर्माण गरिएको भर्सन हाल परीक्षण भइरहेको कम्पनीको भनाइ छ । नेपाली सडक सुहाउदो तरिकाले निर्माण गरिएको सो स्कुटर आगामी बैशाख २९ गते औपचारिक रुपमा सार्वजनिक गरिने भएको छ ।

आगामी बैशाख २९ गते धुलिखेलको डर्ट टेम्पलमा एमएक्स च्याम्पियनसिपको फाइनल खेल हुँदैछ । सोही अवसरमा ग्यारो ईभी स्कुटर समेत सार्वजनिक गरिने छ । सोही समयमा उक्त स्कुटरको वारेमा विस्तृत विवरण सार्वजनिक हुनेछ ।

कम्पनीले अहिले यसको विशेषता, रेन्ज र मूल्य लगायतका कुनै पनि जानकारी दिएको छैन । आकर्षक डिजाइन, अत्याधुनिक प्रविधि र विविध फिचरका कारण यसले गजबको राइडिङ एक्सपेरियन्स दिने बताइएको छ । प्रभावकारी रेन्ज र अद्रितीय पर्फमेन्सका कारण यो स्कुटरले नेपाली बजारमा एक बेन्चमार्क सेट गर्ने कम्पनीको दावी छ ।

क्लासिक ह्विल्सले पहिले देखि नै उपलब्ध गराइरहेका अन्य मोटरसाइकलको सर्भिस नेटवर्क राम्रो छ । सो नेटवर्कमार्फत मार्केट पोर्टफोलियो थप वृद्धि गर्ने लक्ष्यका साथ इलेक्ट्रिक सेगमेन्टमा समेत प्रवेश गरेको कम्पनीको भनाइ छ ।