पोर्चुगलले गर्ने प्रत्येक गोलमा एउटा दिपल कार उपहार

चिनियाँ अटोमेकर चांगनले फुटबल विश्वकपलाई लक्षित गर्दै चीनमा एक निकै आकर्षक र अनौठो बजार प्रवद्र्धन अभियान सुरु गरेको छ । कम्पनीले विश्वकपका खेलहरूमा पोर्चुगलको राष्ट्रिय फुटबल टोलीले प्रहार गर्ने प्रत्येक गोलबापत एउटा दिपल कार निःशुल्क उपहार दिने घोषणा गरेको हो ।

यद्यपि, कम्पनीले ‘निःशुल्क’ शब्दलाई उद्धरण चिन्ह भित्र राखेकाले यसका सर्तहरू भने केही फरक र सचेत हुनुपर्ने खालका छन् । जसअनुसार, विजेताहरूले प्राप्त गर्ने कार पूर्ण स्वामित्वको हुने छैन ।

उनीहरूले दिपल गाडीलाई एक वर्षसम्म निःशुल्क प्रयोग गर्न पाउनेछन्, जुन एक किसिमको निःशुल्क भाडा सरह हो ।

यस अभियानमा सहभागी हुनका लागि ग्राहकले चीनमा रहेका आधिकारिक डिलरमा गएर दिपल कारको टेस्ट ड्राइभ गर्नुपर्ने नियम राखिएको छ ।

कम्पनीका अनुसार, पोर्चुगलले गर्ने प्रत्येक गोलसँगै पुरस्कारको सूचीमा एउटा कार थपिँदै जानेछ । यद्यपि, पेनाल्टी सुट आउट र खेल बराबरी भएपछि हुने टाइ ब्रेकिङ राउन्डका गोलहरूलाई भने यसमा गणना गरिने छैन ।