३ सय किलोमिटर रेन्ज दाबी गरिएका ४ इलेक्ट्रिक कार नेपालमा, यस्तो छ मूल्य र पर्फमेन्स

अटो बजारमा अहिले इलेक्ट्रिक कार सर्बाधिक चर्चाको बिषय बनिरहेको छ । अन्तःशुल्क खारेजी र भन्सार दरमा भारी छुटका कारण मूल्य कम पर्न गएपछि बजारमा यस्ता कारको माग दिनप्रतिदिन बढ्दै गैरहेको छ । माग अनुसार आपूर्ति सहज नहुँदा कतिपय ब्रान्डले अभावको अवस्था समेत झेल्नुपरेको छ । बजारमा देखिएको यो अवस्थालाई मध्यनजर गर्दै विभिन्न आयातकर्ता कम्पनी अहिले इलेक्ट्रिक कार भित्र्याउने होडबाजीमै उत्रिन थालिसकेका छन् । फलस्वरुप झन्डै एक दर्जन हाराहारी ब्रान्डले यस्ता कार आयात गरी कारोबार गरिरहेका छन् ।

बजारमा हाल ब्याट्रीलाई एकपटक फुल चार्ज गर्दा १५० किलोमिटर गुड्ने दीगो ई८ देखि ५२० किलोमिटरसम्म गुड्ने दाबी गरिएको बीवाईडी ई६ सम्मका इलेक्ट्रिक कारको कारोबार भैरहेको छ । जसमध्ये ३ सय किलोमिटर रेन्ज प्रदान गर्ने दाबी गरिएका बीवाईडी, हुन्डाई कोना, एमजी ईजेडएस र टाटा नेक्सन गरी कुल ४ वटा ब्रान्ड सर्बाधिक चर्चित बनेका छन् ।

कोरियन अटोमेकर हुन्डाई मोटर्सले उत्पादन गर्ने कोना नेपाली बजारमा सर्बाधिक लोकप्रिय ईभी हो । कोना १ सय र १ सय ५० किलोवाट क्षमतामा उपलब्ध छ । यसको सय किलोवाट क्षमताले ३१० किलोमिटर रेन्ज प्रदान गर्ने दाबी गरिएको छ । यो ईभीमा ३९.२ किलोवाट आवर क्षमताको लिथियम आयोन ब्याट्री जडान गरिएको छ । नेपाली बजारमा यो ईभीको मूल्य ५६ लाख ९६ हजार रुपैयाँ तोकिएको छ ।

त्यसैगरी विश्वमै सर्बाधिक बिक्री हुने मध्ये एक चिनियाँ ब्रान्ड बीवाईडीका ३ वटा मोडल मध्ये २ वटा मोडलले ३ सय भन्दा बढी रेन्ज प्रदान गर्ने दाबी गरिएको छ । बिवाईडी एम३ ले ३१० र टी३ मोडलले ३०० किलोमिटर रेन्ज प्रदान गर्ने दाबी गरिएको हो । यी दुबै गाडीमा १ सय किलोवाट क्षमताको मोटर जडान गरिएको छ भने ब्याट्रीको क्षमता ५०.३ किलोवाट आवर रहेको छ । यी गाडीको मूल्य नेपाली बजारमा क्रमश ४३ लाख र ३८ लाख रुपैयाँ कायम गरिएको छ ।

विद्युतीय एसयूभी एमजी जेडएसले ११० किलोवाट पावर र ३५० एनएम अधिकतम टर्क दिन्छ र यसमा भएको लिथियम आयोन ब्याट्री ३० मिनेटमा ८० प्रतिशतसम्म चार्ज हुन्छ । एमजी जेडएस ईभीलाई एक पटक चार्ज गरेपछि ४२८ किमीसम्मको माइलेज दिन्छ। यसको मूल्य ५० लाख ९९ हजार रुपैयाँ निर्धारण गरिएको छ ।

केही दिन अघिमात्र सार्बजनिक गरिएको भारतीय अटो मेकर टाटा मोटर्सले उत्पादन गरेको नेक्सन ईभीले ३१२ किलोमिटर रेन्ज प्रदान गर्ने दाबी गरिएको छ । यो एसयूभीमा ९५ किलोवाट क्षमताको मोटर जडान गरिएको छ भने ब्याट्री क्षमता ३०.०२ किलोवाट आवर रहेको छ । ३ भिन्न भेरिएन्टमा उपलब्ध नेक्सन ईभीको बेस भेरिएन्टको मूल्य ३५ लाख ९९ हजार, मिडियम भेरिएन्टको ३७ लाख ९९ हजार र टप भेरिएन्टको मूल्य ३९ लाख ९९ हजार रुपैयाँ निर्धारण गरिएको छ ।