हेटौंडामा राइडर्स मिट सिजन ४ हुने, विदेशी सहितका सहभागी राइडर जंगलमै टेन्ट गाडेर रमाउने

काठमाडौं – फ्रेन्ड्स अफ रोयल इन्फिल्ड अर्थात फोरे नेपालको आयोजनामा आगामी फेब्रुअरी ११ देखि १३ अर्थात माघ २८, २९ र फागुन १ गते सम्म हेटौंडामा राइडर्स मिटको सिजन ४ आयोजना हुने भएको छ ।

रोयल इन्फिल्ड मोटरसाइकल राइडरहरुको समूह फोरे नेपालले प्रत्येक वर्ष आयोजना गर्दै आएको सो इभेन्ट यो वर्ष समेत हुने भएको हो । गत वर्ष कोभिड–१९ का कारण हुन नसके पनि यो वर्षका लागि तयारी थालिएको फोरे नेपालका अध्यक्ष सुनिल मानन्धर डायमन्डले बताए । मोटरसाइकल संस्कृति र लाइफस्टाइलमार्फत स्थानीय पर्यटनलाई समेत प्रवद्र्धन गर्ने उद्देश्यले उनीहरु यस प्रकारको इभेन्ट आयोजना गर्छन् ।

फोरे नेपाल अन्तर्गत हेटौंडाको स्थानीय रोयल इन्फिल्ड क्लब ‘हेटौंडा इन्फिल्डर्स मकवानपुर’ को आयोजनामा सो इभेन्ट हुनेछ । फोरे नेपाल अन्तर्गत रहेका नेपालभरका विभिन्न इन्फिल्ड क्लबहरु यसको आयोजक हुने गर्छन् ।

राइडर्स मिटमा नेपालभर रहेका विभिन्न क्लबका राइडर मात्र नभई भारत, भुटान, अमेरिका, स्विट्जरल्यान्ड र अष्ट्रेलियाका राइडर समेत सहभागी हुने डायमन्डले बताए । यसमा ३ सय ५० भन्दा बढी राइडर सहभागी हुने उनले बताए ।

राइडर्स मिटको अवसरमा लाइभ ब्यान्ड, स्लो र डर्ट बाइक रेस, सांस्कृतिक कार्यक्रम लगायतका विभिन्न मनोरञ्जनात्मक कार्यक्रम गरिने छ । २ रात र ३ दिनको कार्यक्रमका लागि जंगलको बीचमै टेन्ट गाडेर सबै मनोरञ्जनको व्यवस्था गरिने छ । राइडरहरुलाई नयाँपनको अनुभव दिनका लागि पनि यस प्रकारको राइडर्स मिट आयोजना गरिने प्रचलन रहेको डायमन्डले बताए ।

आगामी जनवरी २९ देखि ३० सम्म भारतको हैदरावादमा हुने राइडर मेनियामा समेत हेटौंडामा हुने सो राइडर्स मिटको प्रवद्र्धन गर्ने कार्यक्रम छ । यसका लागि नेपालबाट १४ जना राइडरहरु हैदरावाद सम्म बाइक राइड गर्दै पुग्ने र कार्यक्रममा सहभागी हुने तयारी भएको समेत सरकारले बताए ।

फोरे नेपालले यो भन्दा पहिले राइडर्स मिटको सिजन १ सन् २०१७ मा बर्दियामा आयोजना गरेको थियो । त्यसैगरी सिजन २ सुनसरी र सिजन ३ चितवनमा सम्पन्न गरेको थियो ।