रोचक : फोर्डका सीईओले दैनिक प्रयोग गर्छन् चाइनिज प्रतिस्पर्धी शाओमीको इलेक्ट्रिक कार

अमेरिकी कार निर्माता कम्पनी फोर्डका मालिक कुन कार चढ्छन् होला ? पक्कै पनि फोर्डकै कुनै मोडल । तर तपाईको अनुमान गलत छ । उनी चाइनिज कन्जुमर इलेक्ट्रोनिक्स ब्रान्ड शाओमीको इलेक्ट्रिक कार एसयु७ चढ्छन् ।

यो कुरा फोर्डका सीईओ जिम फार्लेले एभ्रिथिङ इलेक्ट्रिक शो पोडकास्टमा आफैले बताएका हुन् । फोर्डले चीनको सांघाईबाट उक्त कार अमेरिकाको शिकागोमा आयात गरेको थियो र उनले विगत ६ महिना देखि सो कार चढिरहेका छन् ।

आफूले सो कार अझै पनि चढ्ने उनले बताएका छन् । यसलाई छोड्न नचाहेको समेत उनले बताएका छन् । सामान्यतः शाओमी र बीवाईडी जस्ता चाइनिज कार ब्रान्ड अमेरिकी ब्रान्डका लागि चुनौतीपूर्ण छन् । तर फोर्डका सीईओ भने यो कुरामा अलि फरक देखिएका छन् ।

शाओमीको एसयु७ चीनमा सन् २०२४ मा उपलब्ध नयाँ इलेक्ट्रिक कार हो । विशेषतः स्मार्टफोन र कन्जुमर इलेक्ट्रोनिक्स कम्पनीको रुपमा लोकप्रिय शाओमीले इलेक्ट्रिक भेइकल उत्पादन गर्ने योजना सन् २०२१ म सार्वजनिक गरेको थियो ।

शाओमी एसयु७ फुल साइज सेडान हो र यो ३० हजार डलर भन्दा कम मूल्यमै उपलब्ध छ । यसमा एयर सस्पेन्सन, एडेप्टिभ ड्याम्पर र एक्टिभ एरो जस्ता फिचर रहेका छन् । यो शाओमीको आफ्नै लेभल २ र एनओए अर्थात नेभिगेट अन अटोपाइलट सिस्टमका साथ आउँछ, जुन चीनका १०० सहरमा प्रयोग गर्नका लागि प्रमाणित गरिएको छ ।

शाओमी एसयु७ चीनमा एकदमै लोकप्रिय कार बनेको छ । सन् २०२४ का लागि उत्पादन भएको पहिलो दिनमै सो कार सोल्ड आउट भएको थियो । पहिलो मोडल डेलिभरी हुनु पहिले नै शाओमीले १ लाख युनिट कार बिक्री गरिसकेको रिपोर्ट सार्वजनिक भएको थियो ।