पहिलो पटक दुर्घटनामा टेस्ला साइबरट्रक

सन् २०२३ मा लन्च गरिएको टेस्ला साइबरट्रक अमेरिकी सडकमा दुर्घटना भएको छ । मिडिया रिपोर्टका अनुसार उक्त दुर्घटनामा साइबरट्रकका चालकलाई सामान्य चोट लागेको छ भने अर्को गाडीका चालक सकुशल रहेका छन् । साइबरट्रक दुर्घटना भएको यो पहिलो घटना हो ।

रिपोर्टका अनुसार सो घटना २८ डिसेम्बर दिउँसो २ बजे स्टेट रुट ३५ मा भएको हो । साइबरट्रकमा ३ जना यात्रु थिए जसलाई विपरित दिशाबाट आइरहेको टोयोटा कोरोल्लाले ठक्कर दिएको थियो । सो ठक्करबाट टोयोटा कोरोल्ला पूर्ण रुपमा क्षतिग्रस्त भएको छ भने साइबरट्रकमा सामान्य मात्र क्षति भएको छ ।

साइबरट्रकका चालकलाई सामान्य चोट लागेको तर अन्य दुई जना यात्रु सकुशल रहेको जानकारी सार्वजनिक भएको छ । अर्कोतर्फ टोयोटा कोरोल्लाका चालक पनि सकुशल नै छन् । टोयोटा कोरोल्लाका चालक एक १७ वर्षिय बालक भएको पुष्टि भएको छ ।

सामाजिक सञ्जालमा शेयर गरिएका घटनाका तस्विरमा टोयोटा कोरोल्लाले साइबरट्रकलाई साइडबाट ठक्कर दिएको थियो । जसका कारण इलेक्ट्रिक पिकअप ट्रकको देब्रे भागमा सामान्य स्क्रयाच भएको छ । अर्कोतर्फ, टेस्ला साइबरट्रकको तुलनामा टोयोटा कोरोल्लाले धेरै क्षति बेहोरेको छ । यसको साइड प्रोफाइल टक्करद्वारा पूर्ण रुपमा क्षतिग्रस्त भएको छ ।