नेपालमै अटोमोबाइल उद्योग स्थापना गर्न नाडासँग अर्थमन्त्रीको आग्रह, गरे सहयोगको प्रतिबद्धता

काठमाडौं – अटोमोबाइल व्यवसायीहरुको संगठन नाडा अटोमोबाइल्स एसोसिएसन अफ नेपालका अध्यक्ष कृष्णप्रसाद दुलालको नेतृत्वमा गएको ५ सदस्सिय नाडा प्रतिनिधि मण्डलले नवनियुक्त अर्थमन्त्री जनार्दन शर्मालाई शुभकामना दिदै अटोमोबाइल व्यवसायका समसामयिक विषयहरुमा छलफल गरेकोे छ ।

उक्त भेटघाटमा नाडाका अध्यक्ष दुलालले नाडाले फेयर ट्रेडमा विश्वास गर्दे आएको बताउँदै सवारी साधनहरुको आयातको सन्दर्भमा देखिएका विभिन्न समस्याहरु बारे आफनो धारणा राखे । सो छलफलमा अध्यक्ष दुलालले अटोमोबाइल क्षेत्रमा कार्यरत कर्मचारी तथा मजदुरहरुका लागि छिटो कोभिड विरुद्धको खोपको व्यवस्था गरिदिन आग्रह गरे ।

अध्यक्ष दुलालले नेपालमा स्थानीय स्तरमा उत्पादित अटोमोबाइल स्पेयर पार्ट्स तथा लुब्रिकेन्ट्स बढी आयात भइरहेको सन्दर्भमा उच्च गुणस्तरका स्पेयर पार्ट्स तथा लुब्रिकेन्ट्स आयात गर्न सकिने व्यवस्थाका लागि आग्रह गरे । त्यसैगरी सो छलफलमा अध्यक्ष दुलालले आउदो २०७८÷७९ को मौद्रिक नीति अटोमोबाइल व्यवसायमैत्री आउने आशा व्यक्त गरे ।

त्यसैगरी उपाध्यक्ष करण चौधरीले बढ्दो क्रममा रहेको सवारी साधनहरुको आयात नेपाल राष्ट्र बैंकले सवारी साधनहरुको बिक्रीमा लगाएको ५० प्रतिशतको क्यापको कारण आर्थिक बर्ष २०७३/७४ देखि नै क्रमशः घटन थालेको जानकारी दिए । उनले नेपालको सार्वजनिक यातायात राम्रोसँग चल्न नसकेको र सडकको अवस्था पनि राम्रो नरहेको बताए ।

सो भेटघाट तथा छलफलमा महासचिव सुनिल रिजालले आयात गरिने विल कम्प्युटराइज्ड गरिएको खण्डमा अनधिकृत आयातलाई रोक्न सहज हुने बताए ।

उक्त छलफलमा अर्थमन्त्री जनार्दन शर्माले सरकारले सवै नेपाली जनतालाई नै सर्वशुलभ रुपमा खोप उपलब्ध गराउने जानकारी दिदै नेपालमै अटोमोबाइल उद्योग स्थापना गर्न नाडालाई आग्रह गरे । उनले त्यसलाई अघि बढाउन सरकारबाट आवश्यक सहयोग प्राप्त हुने आश्वासन समेत दिए ।

सो छलफलमा नाडाका सचिव अनुप बराल तथा एसोसिएसन सचिव सुरेन्द्र प्रधान समेतको उपस्थिति रहेको नाडाले बताएको छ ।