फियाटले अवार्थ ब्रान्डमा इलेक्ट्रिक कार ल्याउने, अर्को बर्ष लन्च गरिने

इटालियन अटो निर्माता फियाटले अर्को बर्ष नयाँ इलेक्ट्रिक कार लन्च गर्ने भएको छ । फियाट ग्रुप मातहतकै अर्को ब्रान्ड अवार्थको नाममा उसले इलेक्ट्रिक कार ५०० लन्च गर्न लागेको हो । अवार्थले यसअघि नै सो मोडलको मिनी कारलाई पावरफुल इन्जिनमा उतारेर चर्चा कमाइसकेको छ ।

अवार्थ पर्फमेन्स कार निर्माणका लागि विश्वभर लोकप्रिय मानिन्छ । यो नयाँ इलेक्ट्रिक कार पनि निकै नै पावरफुल र ह्याचब्याक सेग्मेन्टको हुने जनाइएको छ । यो कारलाई अहिले कम्पनीले बिभिन्न चरणमा परिक्षण गरिरहेको र सो क्रममा यसले अद्भुत पर्फमेन्स दिन सफल भएको बताइएको छ ।

यो कारमा कुन आकारको ब्याट्री जडान गरिएको छ भन्ने बारेमा कुनै जानकारी नदिइए पनि यसले सिंगल चार्जमा ३२० किलोमिटरसम्मको रेन्ज प्रदान गर्न सक्ने आँकलन गरिएको छ । यो नयाँ इलेक्ट्रिक कारलाई स्टार्ट गरेको ७ सकेन्डमै १ सय किलोमिटर प्रतिघन्टाको गतिमा हाँक्न सकिने र यसको अधिकतम गति १६० किलोमिटरसम्म रहने जनाइएको छ । इलेक्ट्रिक कारमा यसले बिशेष प्रकारको बेन्चमार्क खडा गर्ने कम्पनीले दाबी गरेको छ ।