बीवाइडीको नयाँ फ्ल्यास चार्जिङ क्रान्ति: फाङचेङबाओ बाओ ५ र बाओ ८ अब ५ मिनेटमै चार्ज हुने

बीवाईडीले आफ्ना नयाँ फाङचेङबाओ बाओ ५ र बाओ ८ फ्ल्यास चार्जिङ एडिशन लन्च गरेको छ । कम्पनीले २०२६ मोडलका यी अफरोड एसयूभी चीनमा लन्च गर्दै सुपरफास्ट चार्जिङ प्रविधिको नयाँ युग सुरु गरेको जनाएको छ।

कम्पनीका अनुसार फाङचेङबाओ बाओ ५ फ्ल्यास चार्जिङ संस्करणको सुरुवाती मूल्य ३ लाख ५ हजार ८ सय चिनियाँ युआन तोकिएको छ भने बाओ ८ को मूल्य ४ लाख १९ हजार ८ सय चिनियाँ युआनबाट सुरु हुन्छ। कम्पनीले सुरुमा अर्डर गर्ने ग्राहकहरूले विशेष छुटसमेत प्राप्त गर्ने बताइएको छ।

सो नयाँ मोडलको सबैभन्दा ठुलो विशेषता भनेको यसको १००० भोल्ट डीसी फ्ल्यास चार्जिङ सिस्टम हो । कम्पनीका अनुसार सो प्रविधिले गाडीको ब्याट्रीलाई केवल ५ मिनेटमै १० प्रतिशतदेखि ७० प्रतिशतसम्म चार्ज गर्न सक्षम बनाउँछ। त्यस्तै, ९७ प्रतिशतसम्म चार्ज हुन मात्र ९ मिनेट लाग्ने कम्पनीको दाबी छ। कम्पनीले अब आफ्ना सम्पूर्ण फाङचेङबाओ ब्रान्डका सवारी साधनमा यही सुपरफास्ट चार्जिङ सुविधा उपलब्ध गराउने योजना अघि बढाएको छ।

फाङचेङबाओ बाओ ८ फ्ल्यास चार्जिङ एडिशनमा बीवाइडीको दोस्रो पुस्ताको ब्लेड ब्याट्री प्रविधिमा आधारित ३६.८ किलोवाट आवर क्षमताको ब्याट्री प्रयोग गरिएको छ। कम्पनीका अनुसार फुल चार्ज ब्याट्री र फुल इन्धनको ट्याङ्कसहित सो गाडीले करिब १,३८० किलोमिटरसम्म यात्रा गर्न सक्छ।

कम्पनीले सन् २०२६ को अन्त्यसम्म देशभर २० हजार समर्पित १००० भोल्ट फ्ल्यास चार्जर स्थापना गर्ने महत्वाकांक्षी योजना बनाएको छ । यसले सुपरफास्ट चार्जिङ प्रविधिलाई अझ व्यापक बनाउने विश्वास गरिएको छ।