७१ हजार मूल्यको स्कुटरका लागि १५ लाखको फेन्सी नम्बर प्लेट

कारको लागि लाखौं रुपैयाँको फेन्सी नम्बर (भीआईपी नम्बर) लिने चलन विश्वमा धेरै छ । यो चलन भारतमा पनि छ ।

हाले भारतको चण्डीगढका एक व्यक्तिले आफ्नो होन्डा एक्टिभा स्कुटरको लागि १५ लाख भारुमा फेन्सी नम्बर खरिद गरेका छन् । सो फेन्सी नम्बरको मूल्य स्कुटरको मूल्य भन्दा कैयौं गुणा बढी हो । यो होन्डा एक्टिभा ६जी स्कुटर हो जसको बजारमा मूल्य ७१ हजार भारु छ ।

चण्डीगढका विज्ञापन व्यवसायी ४२ वर्षीय ब्रिजमोहनले चण्डीगढ दर्ता र इजाजतपत्र प्राधिकरणले आयोजना गरेको ई–लिलामीमा १५.४४ लाख भारुको उच्चतम बोली लगाएर फेन्सी नम्बर ‘सीएच–०१–सीजे–०००१’ किनेका थिए । ब्रिजमोहनले सो फेन्सी नम्बर पहिलो पटक किनेका थिए । ब्रिजमोहनले आफ्नो कारको लागि पनि यस्तै फेन्सी नम्बर खरिद गर्ने योजना बनाएका छन् ।

नयाँ सिरिज सीएच–०१–सीजे फेन्सी नम्बरको लागि लिलामी अप्रिल १४ देखि अप्रिल १६, २०२२ सम्म आयोजना गरिएको थियो । चण्डीगढ दर्ता र इजाजतपत्र प्राधिकरणले लगभग ३७८ दर्ता नम्बरहरू लिलामी गरेको थियो, जहाँ कुल १ करोड ५ लाख भारु सङ्कलन गरिएको थियो ।

यसमा सबैभन्दा महँगो नम्बर ब्रिजमोहनले किनेका थिए भने अन्य महँगो फेन्सी नम्बरहरूमा सीएच–०१–सीजे–००७ र सीएच–०१–सीजे–००३ क्रमशः ४ लाख ४ हजार र ४ लाख २ हजार भारुमा बिक्री भएको थियो ।

चण्डीगढमा ०००१ नम्बरको लागि अहिलेसम्म सबैभन्दा उच्च बोली २०१२ मा बिक्री गरिएको थियो । त्यसबेला एक व्यक्तिले सीएच–०१–एपी सिरिज नम्बरको लागि २६ लाख ५ हजार भारु तिरेका थिए । यो नम्बर उनको नयाँ मर्सिडिज बेन्ज एस–क्लासको लागि थियो ।