हुन्डाईले ड्युअल सिलिन्डर टेक्नोलोजी समावेश गरी सीएनजी पोर्टफोलियो विस्तार गर्ने

हुन्डाई माेटर कम्पनीले भारतीय बजारमा आफ्ना सीएनजी गाडीमा ड्युअल सिलिन्डर टेक्नोलोजी उपलब्ध गराउने तयारी गरेको छ । कम्पनीले हालै सीएनजी मोडलका लागि नयाँ ट्रेडमार्क दर्ता पनि गरेको छ ।

हुन्डाईले हाल ग्राण्ड आई१० नियोस, औरा र एक्स्टर जस्ता मोडलमा फ्याक्ट्री फिटेड सिंगल-सिलिन्डर सीएनजी किट उपलब्ध गराउँदै आएको छ । यो निर्णयसँगै दक्षिण कोरियाली कम्पनीले टाटा मोटर्सको ट्विन सिलिन्डर प्रविधिका आई–सीएनजी कारसँग प्रतिस्पर्धा गर्नेछ ।

ग्राण्ड आई१० नियोस हाल हुन्डाईको भारतीय पोर्टफोलियोमा सबैभन्दा सस्तो सीएनजी कार हो, जसको मूल्य ७ लाख ६८ हजारबाट सुरु हुन्छ। औरा सीएनजीको मूल्य ८ लाख ३१ हजार देखि ९ लाख ५ हजार सम्म छ, जबकि एक्स्टर सीएनजीको मूल्य ८ लाख ४३ हजार देखि ९ लाख १६ हजार भारु सम्म छ।

हुन्डाईको ड्युअल सिलिन्डर प्रविधिको बारेमा जानकारी हालै दर्ता गरिएको ट्रेडमार्कबाट आएको हो । कम्पनीले हाइ-सीएनजी नामको साथमा अर्को एचवाई-सीएनजी डुओ नामको ट्रेडमार्क दर्ता गरेको छ । तल्लो स्तरको मोडल हाइ-सीएनजी सिंगल सिलिन्डर किट हुनेछ र प्रिमियम कारले हाइ-सीएनजी डुओ नामको ट्वीन-सिलिन्डर किट हुनेछ । टाटामा जस्तै आगामी हुन्डाई सीएनजी कारमा ट्विन सिलिन्डर टेक्नोलोजीका कारण अधिक बुट स्पेस र अधिक रेन्ज हुनेछ ।

टाटा मोटर्स हाल भारतमा ड्युअल सिलिन्डर सीएनजी टेक्नोलोजी प्रयोग गर्ने एक मात्र कम्पनी हो, जुन गत वर्ष ल्याएको थियो। यो टेक्नोलोजी हाल अल्ट्रोज, टियागो, पन्च र टिगोरको सीएनजी संस्करणमा उपलब्ध छ।

हुन्डाईले आफ्नो सीएनजी पोर्टफोलियो विस्तार गरी आई२० र भेन्यु समावेश गर्ने सम्भावना छ । यसमा टाटाका टियागो, टिगोर र पन्चमा जस्तै ड्युअल सिलिन्डर टेक्नोलोजी हुनेछ ।

ड्युअल सिलिन्डर टेक्नोलोजीमा कारको बुट स्पेसमा एउटा ठुलो सिलिन्डरको सट्टा २ वटा साना सीएनजी सिलिन्डर जडान गरिन्छ। यसले ठुलो सीएनजी सिलिन्डर भएको परम्परागत सीएनजी कारको तुलनामा बुट स्पेस बढाउँछ। जबकि एउटै सिलिन्डर सीएनजी कारमा बुट स्पेस कम हुन्छ।