अध्ययन : ईभी ब्याट्रीको आयु २० वर्षसम्म, ब्याट्री फेल हुने सम्भावना ०.५ प्रतिशत मात्रै

ईभीमा प्रयोग हुने ब्याट्रीको आयु र क्षयिकरणका बारे धेरै छलफल र अनुमान गरिएको छ । धेरैले ब्याट्रीको आयु छोटो हुने र यो केही वर्षभन्दा बढी टिक्न नसक्म्ने दाबी समेत गर्दै आएका छन् । यी अनुमान र दाबीका वावजुत ब्याट्री हेल्थका बारेमा गरिएको एक नयाँ सर्वेक्षणले केही रोचक निष्कर्षहरू बाहिर ल्याएको छ ।

सवारी साधन टेलिमेटिक्स प्रदान गर्ने बेलायती कम्पनी जियोट्याबका अनुसार, धेरैजसो ईभी ब्याट्री २० वर्षसम्म टिक्न सक्छन् । जुन, अमेरिकामा औसत कार उमेर भन्दा ६ वर्ष बढी हो । ब्याट्रीको आयु प्रत्येक वर्ष १.८ प्रतिशतका दरले कम हुने हुँदा रेन्ज समेत हरेक वर्ष १.८ प्रतिशत नै कम हुने उक्त अध्ययनले देखाएको छ ।

प्रत्येक वर्ष १.८ प्रतिशतका दरले माइलेज कम हुँदा पनि २० वर्ष पछि समेत कुल रेन्जको ६४ प्रतिशत हाँसिल गर्न सकिने अध्यनको दाबी छ । यस अध्यनका लागी जियोट्याबले १० हजारभन्दा बढि ईभीलाई समेटेको थियो । यसैगरी, हाई भोल्टेज ईभी ब्याट्रीहरू फेल हुने सम्भावना जम्मा ०.५ प्रतिशत भन्दा कम रहेको समेत बताइएको छ ।

ब्याट्रीको क्षयीकरणमा स्थान विशेषले भुमिका खेल्ने जनाइएको छ । अध्यनका अनुसार, तातो हावापानीले ब्याट्रीको क्षयीकरण तिव्र दरमा हुने भएपनि पछिल्लो समय ब्याट्रीको तापमानलाई नियन्त्रणमा राख्न कुलिङ र हिटिङ सिस्टमहरु निकै प्रभावकारी वनिरहेका छन् । चार्ज गर्दा ईभीलाई छायामा राख्नु राम्रो हुने उक्त अध्यानले सुझाएको छ ।

ब्याट्रीको आयु बढाउनका लागि निकल–म्यांगनीज–कोबाल्ट (एनएमसी) र निकल–कोबाल्ट–म्यांगनीज (एनसिएम) ब्याट्रीहरूमा एसओसीलाई २० र ८० प्रतिशतको बीचमा राख्न सिफारिस गरिएको छ । यो सीमा सामान्यतया लिथियम–आइरन–फस्फेट(एलएफपी) ब्याट्रीहरूमा लागू नहुने भएपनि यस्ता ब्याट्रीलाई निरन्तर टप अफ गर्दा भने आयु घट्ने सुझाव दिइएको छ ।