युरोपमा बिक्री हुने सिट्रोन ईसी३ को भारतमा परीक्षण सुरु

सिट्रोनले युरोपेली बजारलाई लक्षित गरी ल्याउन लागेको नयाँ जेनेरेसन ईसी३ लाई भारतमा परीक्षण सुरु गरेको छ । २०२३ मा युरोपेली बजारको लागि नयाँ जेनेरसेन ईसी३ डेब्यु गरिएकोमा हाल परीक्षण सुरु भएको हो ।

युरोप स्पेक ईसी३ लाई सिट्रोनले स्टेलान्टिसको स्मार्ट कार प्लेटफर्ममा तयार पारेको हो । यसको स्टाइलिङ ओली अवधारणाबाट प्रेरित छ र केन्द्रमा सिट्रोनको नयाँ लोगो राखिएको छ । कारमा थ्री पिस एलईडी डीआरएलएस सहित भी आकारको एलईडी हेडलाइटयुक्त एङगुलर फ्रन्ट फेसिया दिइएको छ । यसमा पछाडि कालो स्ट्रिपद्वारा जोडिएको -यापराउन्ड एलईडी टेललाइट राखिएको छ ।

नयाँ जेनेरेसन ईसी३ मा १०.२५ इन्चको टचस्क्रिन र हेड–अप डिस्प्ले सहितको टु–स्पोक स्टेयरिङ ह्वील उपलब्ध गराइएको छ । साथै यसको इन्टेरियरलाई आधुनिक र सुबिधासम्पन्न बनाउन रि–डिजाइन गरिएको छ ।

नयाँ ईसी३ को अगाडि माउन्ट गरिएको इलेक्ट्रिक मोटर जडान गरिएको छ, जसले १११ बिएचपी पावर प्रदान गर्दछ । कारमा ४४ किलोवाट आवर क्षमताको ब्याट्री प्याक राखिएको छ, जसले डब्लुएलटीपी साइकल अनुसार ३२० किलोमिटर रेन्ज दिने दाबी गरिएको छ ।