नागढुंगा सुरूङ मार्गबाट चल्ने सवारीसाधनहरुको तोकियो दस्तुर, कुनको कति ?

काठमाडौं - सरकारले सञ्चालनको तयारीमा रहेको नागढुंगा–सिस्नेखोला सुरुङमार्ग प्रयोग गर्ने सवारी साधनका लागि दस्तुर तोकेको छ ।

साउन २६ गते बसेको मन्त्रिपरिषद्को बैठकले सवारी साधनको प्रकार र यात्राको दिशा (काठमाडौं प्रवेश वा बाहिरिने) अनुसार नागढुंगा–सिस्नेखोला सुरुङमार्गको दस्तुर निर्धारण गरेको हो ।

सुरुङमार्गबाट कार र भ्यान काठमाडौं प्रवेश गर्दा ६५ रुपैयाँ तोकिएको छ भने काठमाडौंबाट बाहिरिँदा ६० रुपैयाँ तिर्नु पर्नेछ । यस्तै, मिनीबस र मिनिट्रक काठमाडौं प्रवेश गर्दा ११५ रुपैयाँ तिर्नुपर्छ भने काठमाडौंबाट बाहिरिँदा ८० रुपैयाँ तिर्नुपर्ने हुन्छ । त्यसैगरी बस र ट्रक काठमाडौं प्रवेश गर्दा २६० रुपैयाँ तिर्नुपर्छ भने काठमाडौंबाट बाहिरिँदा २०० रुपैयाँ तिर्नुपर्ने हुन्छ ।

भारी उपकरण काठमाडौं प्रवेश गर्दा ६०० रुपैयाँ तिर्नुपर्छ भने काठमाडौंबाट बाहिरिँदा २५० रुपैयाँ तिर्नुपर्ने सरकारले निर्णय गरेको छ । यो दस्तुर निर्धारणको उद्देश्य सुरुङमार्गको मर्मत–सम्भार, सञ्चालन लागत र लगानी फिर्ता सुनिश्चित गर्नु हो ।