वागन आर अब टोयोटाले बजारमा ल्याउने, आउँदै छ इलेक्ट्रिक भर्सनमा

मारुती सुजुकी वागन आर धेरैलाई मन पर्ने गाडी हो । कम मूल्यमा उपलब्ध हुने र परिवारका सदस्य आरामका साथ बस्न सकिने यो कार इलेक्ट्रिकमा आयो भने कति रमाइलो होला ? थोरै खर्चमा यसलाई चलाउन सकिएला ।

तर मारुती सुजुकीको वागन आर अब इलेक्ट्रिक अवतारमा भने टोयोटाले लिने भएको छ । टोयोटाको ब्रान्डिङ भएको वागन आर हालै परीक्षणको क्रममा देखिएको छ । सो कारको लुक र डिजाइन पनि धेरै फरक देखिएको छ ।

टोयोटाले बजारमा उपलब्ध गराउने सो इलेक्ट्रिक वागन आरको नयाँ नाम टोयोटा हाइरिडर हुने अुनमान गरिएको छ । टोयोटाले केही समय पहिले यो नामको ट्रेडमार्क दर्ता गराएकोले यो अनुमान गरिएको हो । यसको इन्टेरियर र एक्सटेरियरमा भने व्यापक परिवर्तन हुने पक्का भएको छ ।

यसको फ्रन्ट भाग पुरै बदलिएको छ । यसमा एक पातलो ग्रिल सामेल छ, जुन टर्न इन्डिकेटरको रुपमा देखिन्छ । यसमा फ्रन्ट र रियर बम्परलाई अपडेट गरिएको छ ।

टोयोटाले ल्याउने वागनर आरको इन्जिन वा ब्याट्री सेटअपको वारेमा पनि अहिले केही बताइएको छैन । यद्यपि यसमा १० देखि २५ किलोवाट आवरको लिथियम आयोन ब्याट्री प्याक प्रयोग हुने अनुमान गरिएको छ । यो वर्षको अन्त्य वा सन् २०२२ को प्रारम्भमा टोयोटा हाइरिडर बजारमा आउने अनुमान गरिएको छ ।

टोयोटा र मारुतीले गत वर्ष देखि नै विभिन्न क्षेत्रमा सहकार्यको घोषणा गरेका छन् । यस अन्तर्गत अन्य कारहरु समेत बजारमा आइसकेका छन् ।