इलेक्ट्रिक सवारीका टायर पेट्रोल वा डिजेलको तुलनामा चाँडै खिइन्छ किन ? यस्तो छ कारण

इलेक्ट्रिक सवारी साधनका टायर पेट्रोल वा डिजेल कारमा प्रयोग हुने टायरको तुलनामा औसत २० प्रतिशत छिटो घिस्रने गरेको तथ्य सार्वजनिक भएको छ ।

प्रख्यात टायर निर्माता मिशेलिनको प्रतिवेदनअनुसार इलेक्ट्रिक सवारीमा प्रयोग हुने टायर आन्तरिक दहन इन्जिन कारहरूको तुलनामा करिब २० प्रतिशत छिटो बिग्रन सक्छन्। उदाहरणका लागि, यदि कुनै सामान्य पेट्रोल कारको टायर १० हजार किलोमिटर टिक्छ भने, उही स्तरको टायर इलेक्ट्रिक गाडीमा करिब ८ हजार किलोमिटरमै परिवर्तन गर्नुपर्ने अवस्था आउन सक्छ। यद्यपि यो दूरी सवारी चलाउने शैली, सडकको अवस्था र मर्मतसम्भारमा पनि निर्भर रहने बताइएको छ।

यसको मुख्य कारण गाडीको तौल हो। इलेक्ट्रिक सवारीमा ठूलो क्षमताको लिथियम–आयन ब्याट्री जडान गरिन्छ, जसले गाडीको समग्र तौल उल्लेखनीय रूपमा बढाउँछ। एउटै सेगमेन्टको पेट्रोल कारको तुलनामा इलेक्ट्रिक सवारी ३०० देखि ५०० किलोग्रामसम्म भारी हुन्छ । अतिरिक्त तौलका कारण टायरमा निरन्तर तलतिर दबाब पर्छ, जसले सडकसँगको सम्पर्क क्षेत्र बढाउँछ र घर्षण तीव्र बनाउँछ। विशेषगरी मोडिने बेला र ब्रेक लगाउँदा टायरमा बढी तनाव उत्पन्न हुन्छ, जसले छिटो घिस्रने समस्या निम्त्याउँछ।

पेट्रोल गाडीमा टर्क क्रमशः बढ्दै जान्छ भने इलेक्ट्रिक गाडीमा एक्सिलरेटर थिच्नेबित्तिकै पूर्ण टर्क उपलब्ध हुन्छ। यसले गाडीलाई तीव्र गतिमा अगाडि बढाउँछ, तर त्यही क्षण टायरले सडकमा अचानक बलपूर्वक समात्नुपर्ने हुन्छ। परिणामस्वरूप रबरका सूक्ष्म कणहरू चाँडै झर्ने र घिस्रने प्रक्रिया तीव्र हुन्छ।

यसका साथै आवाजको पक्ष पनि महत्वपूर्ण मानिन्छ। इन्जिन नहुँदा इलेक्ट्रिक सवारीहरू अत्यन्त शान्त हुन्छ । यस्तो अवस्थामा टायरबाट आउने आवाज बढी महसुस हुन सक्छ। त्यसैले इलेक्ट्रिक सवारीका लागि बनाइने टायरमा विशेष प्रकारको फोम र नरम रबर मिश्रण प्रयोग गरिन्छ, जसले आवाज कम गर्न मद्दत गर्छ। तर नरम रबरले राम्रो पकड दिनुका साथै छिटो घिस्रने सम्भावना पनि बढाउँछ।

ड्राइभिङ शैलीले टायरको आयुमा पनि ठुलो प्रभाव पार्छ। बारम्बार तीव्र गति बढाउने, अचानक कडा ब्रेक लगाउने वा उच्च गतिमा तीव्र मोड लिने बानीले टायरमा अतिरिक्त दबाब सिर्जना गर्छ। त्यसैले बिस्तारै गति बढाउने, सहज रूपमा ब्रेक लगाउने र सन्तुलित ढंगले सवारी चलाउने बानीले टायरको आयु औसत १० देखि १५ प्रतिशतसम्म बढाउन सक्छ।

पेट्रोल कारका टायर इलेक्ट्रिक सवारीमा प्रयोग गर्न प्राविधिक रूपमा हेर्दा उपयुक्त विकल्प होइन। इलेक्ट्रिक सवारीका लागि बनाइएका टायरहरू बढी तौल सहनसक्ने, कम रोलिङ प्रतिरोध दिने र उच्च टर्क सम्हाल्न सक्ने गरी डिजाइन गरिएको हुन्छ । साधारण पेट्रोल गाडीका टायर प्रयोग गर्दा गाडीको दूरी घट्न सक्छ, ह्यान्डलिङमा असर पर्न सक्छ र दीर्घकालमा सुरक्षा जोखिम समेत बढ्न सक्छ।

इलेक्ट्रिक सवारीका टायर छिटो घिस्रने तथ्य वास्तविक भए पनि उचित टायर छनोट, नियमित मर्मतसम्भार र सन्तुलित ड्राइभिङ शैली अपनाएमा यो समस्यालाई धेरै हदसम्म नियन्त्रण गर्न सकिन्छ ।