यस्तो छ इलेक्ट्रिक कारको सर्भिसिङ गर्दा ध्यान दिनुपर्ने कुराहरू

इलेक्ट्रिक कारहरु पेट्रोल र डिजेल कारहरू जत्तिकै लोकप्रिय बन्दै गएको छ । तर, इलेक्ट्रिक कार किन्ने धेरै उपभोक्ताले सर्भिसिङमा लापरवाही गर्ने प्रवृत्ति बढिरहेको देखिन्छ, जसले ब्याट्री र मोटरमा दीर्घकालीन समस्या निम्त्याउने देखिएको छ । नियमित रूपमा सर्भिसिङ नगर्नु, कारलाई अनुचित स्थानमा पार्क गर्नु वा आवश्यक जाँच नहुनु जस्ता कारणले इलेक्ट्रिक सवारीको कार्यक्षमता तथा आयु दुवैमा नकारात्मक असर पर्न सक्छ ।

रिपोर्टका अनुसार इलेक्ट्रिक कारलाई प्रत्यक्ष घाममा पार्क गर्नु अत्यन्त हानिकारक हुन सक्छ, किनकि यसले ब्याट्रीको तापक्रम असन्तुलित बनाउँछ र मोटरमा समेत प्रतिकूल प्रभाव पार्न सक्छ । यस्ता साना देखिने तर महत्त्वपूर्ण सावधानी नअपनाउँदा अत्यधिक तापजन्य क्षति हुन सक्ने र मर्मत कठिन तथा खर्चिलो बन्ने चेतावनी दिइएको छ ।

इलेक्ट्रिक कारको सुरक्षाको लागि नियमित र समयमै सर्भिसिङ गनुपर्छ । निर्धारित समयमा सर्भिसिङ गर्दा सम्भावित खराबीहरू प्रारम्भिक चरणमै पहिचान गर्न सकिन्छ र कारको समग्र जीवनकाल पनि बढ्छ । सर्भिसिङमा मुख्यतया ब्याट्रीमा विशेष रूपमा ध्यान दिनुपर्छ ।

इलेक्ट्रिक कारमा इन्जिन नहुन सक्छ । तर धेरैले ब्याट्रीको तापक्रम सन्तुलनमा राख्न कूलेन्टको प्रयोग गरिन्छ । त्यसैले सर्भिसिङका क्रममा कूलेन्टको स्थिति जाँच गर्नु, आवश्यक परे प्रतिस्थापन वा भर्ने कार्य गर्नु आवश्यक छ । 

साथै ब्याट्री र मोटर लगायत ब्रेक प्याड, टायर, हेडलाइट तथा अन्य लाइटिङ उपकरणको पनि नियमित जाँच आवश्यक छ । आवश्यकता अनुसार टायर घुमाउने, ब्रेक प्याड बदल्ने तथा लाइट सेटिङ समायोजन गर्ने जस्ता कार्यले सवारीको सञ्चालन सहज र सुरक्षित बनाउँछ ।

इलेक्ट्रिक कार उच्च प्रविधियुक्त भए पनि यसको सर्भिसिङ सामान्य पेट्रोल–डिजेल कारभन्दा सरल मानिन्छ । तर उपभोक्ताले आवश्यक सावधानी नअपनाए ब्याट्री तथा मोटर जस्ता संवेदनशील भागमा गम्भीर क्षति हुन सक्छ । नियमित सर्भिसिङ, उचित पार्किङ र समयमै जाँच गरेर मात्र इलेक्ट्रिक कारको वास्तविक कार्यक्षमता र दीर्घकालीन सुरक्षा सुनिश्चित गर्न सकिन्छ  ।