नेपालमा इलेक्ट्रिक कार चार्जिङ स्टेशन : यस्तो छ विभिन्न कम्पनीको हालको अवस्था र आगामी योजना

नेपाली बजारमा अहिले इलेक्ट्रिक कारको क्रेज बढ्दै गएको छ । चालु आर्थिक वर्षको बजेटमा अन्तःशुल्क खारेजी र भन्सार दरमा भारी कटौती गरिएका कारण यस्ता साधनको मूल्य समेत कम भएको छ । मूल्य कम भएपछि उपभोक्ताहरु अहिले इलेक्ट्रिक कार खरिद गर्न लालायित देखिन्छन् । वातावरणमैत्री साधनका रुपमा चिनिने यस्ता साधनको सञ्चालन खर्च समेत निकै न्यून पर्ने हुँदा उपभोक्ता यस्ता कार खरिदमा रुचिकर देखिएका हुन् ।

यद्यपि यस्ता सवारी साधनका लागि आवश्यक चार्जिङ स्टेशनलगायतका पूर्वाधार निर्माण गर्नुपर्ने आवश्यकता भने छ । तर यसका लागि सरकारी क्षेत्रबाट पनि खासै कार्य अगाडि बढेको पाइदैन । अबको १० वर्षपछि विद्युतीय सवारीसाधन मात्र सञ्चालनमा ल्याउने घोषणा गरेको सरकारले ईभीमैत्री सडक र चार्जिङ स्टेशन निर्माणमा भने खासै चासो दिन नसकेको हो । यद्यपि नेपाल विद्युत प्राधिकरणले देशका बिभिन्न ५० स्थानमा चार्जिङ स्टेशन निर्माण गर्ने तयारी भने थालिसकेको छ । यसैगरी बागमती प्रदेश सरकारले पनि टेन्डरलगायतका कार्य अगाडि बढाएको छ ।

इलेक्ट्रिक भेइकल प्रबद्र्धनमा आवश्यक पर्ने पूर्वाधार निर्माणमा सरकारले खासै चासो नदेखाएपछि पछिल्लो समय यस्ता साधन आयात गर्ने कम्पनीहरु आफै पूर्वाधार निर्माणमा जुट्न थालेका छन् । हाल हुन्डाई, किया, एमजी, टाटा, निसान, बीवाईडी, दीगो र डेरी लगायत ब्रान्डका इलेक्ट्रिक कार नेपाल आयात भएका छन् । यी मध्ये हुन्डाई, किया, टाटा र बीवाईडी आफ्नै चार्जिङ स्टेशन निर्माणमा अग्रसर देखिएका हुन् ।

हुन्डाईको २२ स्थानमा चार्जिङ प्वाइन्ट
हुन्डाई गाडीको आधिकारिक बितरक लक्ष्मी इन्टरकन्टिनेन्टल प्रालिले हालसम्म २२ वटा चार्जिङ प्वाइन्ट स्थापना गरेको बताएको छ । हुन्डाईका प्रायः सबैजसो शोरुम र सर्भिस सेन्टर तथा केही होटल तथा रिसोर्टमा यस्ता प्वाइन्ट स्थापना गरिएका हुन् । आगामी दिनमा ग्राहकको सुबिधाका लागि अन्य स्थानमा समेत थप चार्जिङ स्टेशन निर्माण गर्ने कम्पनीको योजना छ ।

बीवाईडीको १६ स्थानमा
नेपाली बजारमा पहिलोपटक भित्रिएको प्रिमियम ब्रान्ड बीवाईडीको हाल १६ स्थानमा चार्जिङ स्टेशन सञ्चालन भैरहेको छ । नेपालस्थित आधिकारिक बितरक साइमेक्स इंकका अनुसार काठमाडौं उपत्यकाका विभिन्न स्थानमा गरी ९ वटा र बाहिरी जिल्लामा ७ वटा सहित कुल १६ चार्जिङ स्टेशन सञ्चालनमा ल्याइएको हो । उपत्यका बाहिर पोखरा, बुटवल, लुम्बिनी, हटौडा, बर्दिबास, चितवन र इटहरीमा चार्जिङ स्टेशन सञ्चालन भैरहेका छन् । निकट भविष्यमै थप ८ स्थानमा यस्ता प्वाइन्ट सञ्चालन गरिने कम्पनी स्रोतले बताएको छ ।

कियाको ७ स्थानमा
किया मोटर्सको आधिकारिक बितरक कन्टिनेन्टल इन्टरप्राइजेजले देशका विभिन्न ७ स्थानमा चार्जिङ स्टेशन निर्माण गरेको छ । कम्पनीले उपत्यकामा ३ सहित बाहिर ४ गरी कुल ७ वटा यस्ता स्टेशन निर्माण गरेको हो । उपत्यका बाहिर चुम्लिङटार, भरतपुर र पोखरामा एसी चार्जर राखेको कम्पनीले कुरिन्टारमा भने डिसी चार्जर राखेको छ । निकट भबिष्यमा भक्तपुर, हेटौडा, जनकपुर, बर्दिबास, बिर्तामोड, बिराटनगर, बुटवल, भैरहवा, दाङ, नेपालगञ्ज र धनगढीमा समेत चार्जिङ प्वाइन्ट निर्माण गर्ने कम्पनीको योजना छ ।

नेक्सन ईभीको ८ स्थानमा
केहीदिन अघिमात्र सार्बजनिक गरिएको टाटा नेक्सन ईभीको हालसम्म ८ वटा चार्जिङ स्टेशन निर्माण भैसकेको छ । आधिकारिक बितरक सिप्रदी ट्रेडिङ स्रोतका अनुसार उपत्यकाको बागडोलका साथै चुम्लिङटार, पोखरा, भैरहवा, हटौंडा, मुलकोट र इटहरीमा फास्ट चार्जिङ स्टेशन निर्माण गरिएको छ । यीबाहेक दोस्रो चरणअन्तर्गत थप ७ ठाउँमा चार्जिङ स्टेशनको निर्माण गरिने उक्त स्रोतले जानकारी गराएको छ । ग्राहकको सहजताका लागि प्रत्येक १५० किलोमिटरको दुरीमा यसप्रकारको स्टेशन निर्माण गरिने उसको भनाइ छ । डिसी चार्जिङ स्टेशनबाहेक कम्पनीले एक सय ठाउँमा इभी चार्जिङ पोर्ट पनि राख्ने बताएको छ । यसको साथै कम्पनी आफैले ग्राहकको घरमा चार्जिङ पोर्ट समेत जडान गरिदिने बताइएको छ ।

एमजीको १ स्थानमा, थप २५ स्थानमा निर्माण गर्ने तयारी
सर्बाधिक रुचाइएको इलेक्ट्रिक कार मध्येको एक एमजी मोटर्सको भने हाल काठमाडौं धुम्वाराहीस्थित सर्भिस सेन्टरमा मात्र चार्जिङ स्टेशन रहेको छ । कम्पनीले निकट भविष्यमा देशका बिभिन्न २५ स्थानमा यस्ता स्टेशन निर्माण गर्ने तयारी थालेको कम्पनी स्रोतको भनाइ छ । केहीसमय पहिले एमजी ईजेडएस खरिद गर्ने ग्राहकलाई कम्पनीले ७ वाट क्षमताको फास्ट चार्जर निःशुल्क उपलब्ध समेत गराउँदै आएको थियो । सो चार्जरको सहयोगमा ग्राहकले आफ्नै घरमा सजिलै ब्याट्री चार्ज गर्न सक्ने बताइएको छ । हालका लागि भने यो सुबिधालाई सशुल्क गरिएको उक्त स्रोतले जानकारी गराएको छ ।

अन्य ब्रान्डको अवस्था
हालसालै नेपाल भित्रिएको निसान लिफका लागि कम्पनीले तत्काल आफ्नो आधिकारिक सर्भिस सेन्टरबाट चार्जिङ सेवा उपलब्ध गराउँदै आएको छ । आधिकारिक बितरक पायोनियर मोटोकर्पका अनुसार निकट भविष्यमा देशका विभिन्न स्थानमा चार्जिङ स्टेशन निर्माण गर्दै जाने योजनामा यो कम्पनीले तयारी थालेको छ । सस्तो र सानो इलेक्ट्रिक कारका नामले चिनिने दीगो ब्रान्डले हाल सिन्धुली मुलकोट र भक्तपुरको बालकोटमा चार्जिङ स्टेशन बनाएको छ । उसले पनि यस्ता स्टेशन क्रमिक रुपमा थप्दै जाने योजना बनाएको छ । त्यस्तै अर्को चिनियाँ ब्रान्ड डेरीले समेत भोलिका दिनमा यस्ता पूर्वाधार निर्माणलाई प्राथमिकता दिने बताएको छ ।