अब ड्राइभिङ लाइसेन्सको अवधि १० वर्ष, हट्याे ५ वर्षे नियम

काठमाडौं - सरकारले सवारी चालक अनुमतिपत्र (ड्राइभिङ लाइसेन्स)को अवधि संशोधन गरेको छ। 

सवारी तथा यातायात व्यवस्था ऐन २०४९ मा संशोधन गर्दै १० वर्ष कायम गरेको हो। 

यसअघि लाइसेन्सको अवधि ५ वर्ष मात्र रहँदै आएको थियोे। उक्त अवधि सकिएपछि चालकहरुले पुनः नवीकरण गर्दै आएकामा अबदेखि भने १० वर्षसम्म अवधि राखिएको हो। 

राजपत्रमा प्रकाशित केही नेपाल ऐनलाई संशोधन गर्न बनेको ऐनको दफा २३ मा भनिएको छ, ‘दफा ५६ को उपदफा ३ मा रहेका पाँच वर्षसम्मको भन्ने शब्दहरुको सट्टा दश वर्षसम्मको भन्ने शब्दहरु राखिएका छन्।’ 

सरकारले नेपाल राजपत्रमा सूचना प्रकाशित गरेसँगै यो व्यवस्था कानुनी रूपमा लागु भएको छ । यसले सवारी चालकहरूलाई हरेक पाँच वर्षमा लाइसेन्स नवीकरण गर्नुपर्ने झन्झटबाट राहत दिनेछ ।