अब लाइसेन्स परीक्षाको आवेदन खुल्ने, स्वीकृत भयो परीक्षाको मापदण्ड

काठमाडौं – यातायात व्यवस्था विभागले संक्रमणको विशेष अवस्थामा सवारी चालक अनुमति पत्र परीक्षा (सञ्चालन तथा व्यवस्थापन) सम्बन्धी मापदण्ड २०७८ स्वीकृत गरेको छ ।

यस अनुसार अब नयाँ मापदण्ड बमोजिम परीक्षा सञ्चालन हुनेछ । नेपाल सरकारले तोकेको स्वास्थ्य सुरक्षा मापदण्ड अपनाउन सकिने गरी एक सिफ्टमा बढीमा १०० जना परिक्षार्थीको परीक्षा गराउन सकिने छ ।

एउटा कोठामा बढीमा २५ जना राख्ने व्यवस्था गरिएको छ । यस्तै ट्रायल पनि एक सिफ्टमा बढीमा ५० जनालाई मात्र सहभागी गराउने मापदण्ड स्वीकृत भएको हो ।

मापदण्ड अनुसार कार्यालयले खुला ठाउँ भएको विद्यालय वा अन्य भवन खोजी लिखित परीक्षा सञ्चालन गर्नुपर्ने छ । त्यस्तै प्रयोगात्मक परीक्षाको लागि यातायात कार्यालयहरुले २४ घण्टा अगाडि परीक्षाको विवरण तोक्नुपर्ने मापदण्डमा उल्लेख छ । परीक्षा दिन आउनेका लागि मास्क र स्यानिटाइजर पनि अनिवार्य गरिएको छ ।

यसै सन्दर्भमा विभागले सवारी चालक अनुमति पत्र (लाइसेन्स) को परीक्षा पनि गर्ने भएको छ । परीक्षासँगै नयाँ आवेदकका लागि अनलाइन फारम पनि खुलाइने विभागले जनाएको छ । कोभिड–१९ का कारण गत बैशाख १६ देखि बन्द गरिएको लाइसेन्स परीक्षा त्यसयता भएको छैन ।

परीक्षाको मापदण्ड स्वीकृत भएसँगै यातायात कार्यालयहरुले अब परीक्षाको सूचना निकाल्ने र यसका लागि स्वीकृति दिइएको यातायात व्यवस्था विभागले जनाएको छ ।

हालको व्यवस्था अनुसार विभिन्न प्रदेशका यातायात कार्यालयहरुले परीक्षाको सूचना निकाल्ने व्यवस्था छ ।