सन् २०२४ : भारतमा हुन्डाईको रेकर्ड हाई सेल

हुन्डाई इन्डियाले भारतको घरेलु बजारमा सन् २०२४ मा रेकर्ड हाई सेल अर्थात हाल सम्मकै सबैभन्दा धेरै कार बिक्री गरेको छ । घरेलु बजारमा हुन्डाईले सो वर्ष ६ लाख ५ हजार ४३३ युनिट गाडी बिक्री गरेको हो ।

हुन्डाईले अन्तर्राष्ट्रिय बजार समेत गरी यो वर्ष ७ लाख ६४ हजार ११९ युनिट गाडी बिक्री गरेको छ । डिसेम्बर महिनामा मात्रै हुन्डाईले समग्रमा ५५ हजार ७८ युनिट गाडी बिक्री गरेको छ ।

हुन्डाई मोटर इन्डियाका डाइरेक्टर तथा चिफ अपरेटिङ अफिसर तरुण गर्गले तीन वर्ष सम्म लगातार रुपमा हुन्डाईको बिक्री बढिरहेको बताए । उनका अनुसार यो वर्ष १ लाख ८६ हजार ९१९ युनिट बिक्रीका साथ भारतीय बजारमा हुन्डाई क्रेटा एसयूभी लिडर बनेको छ । डोमेस्टिक एसयूभी बजारमा क्रेटाको योगदान ६७.६ प्रतिशत रहेको छ ।

यो वर्ष क्रेटा ईभी समेत लन्च हुने र यसबाट सो एसयूभी चाहने ग्राहक अझै बढ्ने अपेक्षा गरिएको छ ।

हुन्डाई क्रेटा वाहेक सो वर्ष भारतमा लोकप्रिय बनेका मोडलमा हुन्डाई भेन्यु र टुसान रहेका छन् ।

हुन्डाईको बिक्रीमा १३.१ प्रतिशत योगदान सीएनजी भर्सनको समेत रहेको छ । हुन्डाई अउरा र ग्रान्ड आई१० नियोस लगायतका गाडीले यसमा भूमिका खेलेका छन् ।