डल्फिनमा थपियो दुई भरिएन्ट, आयो नयाँ एडिसन

बीवाइडीले आफ्नो लोकप्रिय ह्याचब्याक कार डल्फिनको उत्पादन ५ लाख युनिट पुरा भएको अवसरमा नयाँ एडिसन बजारमा ल्याएको छ । कम्पनीले २२ सेप्टेम्वरमा डल्फिनको ‘कमेमोरेटिभ’ एडिसनलाई चिनियाँ बजारमा लन्च गरेको हो ।

यो नयाँ एडिसनलाई बीवाइडीले प्रो र प्लस गरी दुईवटा भेरिएन्टमा लन्च गरेको छ । जसको मूल्य चीनमा १७ हजार ३०० देखी १९ हजार डलरसम्म कायम गरिएको छ । यसको एक्सटेरियरमा सामान्य परिवर्तन गरिएको छ भने इन्टेरियर भित्र केही फिचर थप गरिएको छ ।

नयाँ एडिसनमा बीवाइडले कालो र रातो रङको पेन्ट स्किम दिएको छ भने ग्रीललाई झनै बोल्ड बनाएको छ । साथै पार्किङ गर्न सहज होस भनेर यसको फ्रन्टमा राडर जडान गरिएको छ । एड्भान्स ड्राइभिङ एसिस्टेन्समा सहजताका लागी कारको बडीमा ५ वटा क्यामेरा राखिएको छ ।

बीवाइडीको पछिल्लो ई–प्लेटफर्म ३.० मा आधारित भई निर्माण गरिएको यसमा भेइकल कन्ट्रोल यूनिट, ब्याट्री मेनेज्मेन्ट सिस्टम, पावर डिस्ट्रिब्यूसन यूनिट, ड्राइभ मोटर, मोटर कन्ट्रोलर, ट्रान्ससिमन र अन बोर्ड चार्जर जस्ता महत्वपूर्ण ८ फङ्सनलाई एउटै पावरट्रेनमा सामेल गरिएको छ ।

ब्याट्री र मोटर रेगुलर मोडलबाटै लिइएको यो कारले सिंगल चार्जमा ४२० किलोमिटर रेन्ज दिने दावी गरिएको छ । रेगुलर डल्फिनमा ४४.९ किलोवाट आवरको ब्लेड ब्याट्री र ७० किलोवाटको मोटर जडान गरिएको छ । इन्टेरियर भित्र उपलब्ध इक्विपमेन्टहरु पनि पुरानै मोडलबाट लिइएको यसको हेडरेष्टमा ५ लाख लेखिएको ब्याज टाँसिएको छ ।

डल्फिन हालै सम्पन्न नाडा अटो शोमा नेपाल आएको थियो । नेपालका लागि आधिकारिक वितरक साइमेक्स इंक प्रालिले अटो शोबाट यसको वुकिङ निकै राम्रो संख्यामा प्राप्त गरेको जनाएको छ । यसको मूल्य ३९ लाख ८० हजार रुपैयाँ निर्धारण गरिएको छ ।