के गाडीको इन्जिन आयल पनि एक्सपायर हुन्छ ?

कार, मोटरसाइकल, स्कुटर वा कुनै पनि मोटर गाडी चलाउनुहुन्छ भने त्यसको इन्जिनमा प्रयोग हुने इन्जिन आयलको बारेमा सचेत हुनुपर्छ । धेरैजसो सवारी साधन चालकले इन्जिन आयल केवल प्रयोगपछि मात्र खराब हुन्छ भन्ने सोच्ने गरेका छन् । तर, विज्ञहरूका अनुसार इन्जिन आयलको पनि म्याद सकिन्छ, जसले गाडीको प्रदर्शनमा नकारात्मक असर पार्न सक्छ।

इन्जिन आयलले इन्जिनका पार्टपुर्जालाई लुब्रिकेट गर्ने मात्र होइन, इन्जिनलाई अत्यधिक तातो हुनबाट पनि रोक्छ । यसले कारको इन्जिनलाई लामो समयसम्म टिकाउन पनि मद्दत गर्छ । तर के तपाईंले कहिल्यै सोच्नुभएको छ कि इन्जिन आयल पनि अन्य चीज जस्तै म्याद सकिन्छ कि सकिँदैन ? इन्जिन आयल कहिले परिवर्तन गर्नु आवश्यक छ र परिवर्तन नगरिएमा के क्षति हुन सक्छ जान्नुहोस् ।

इन्जिन आयलको म्याद कति हुन्छ? : इन्जिन आयलको पनि निश्चित आयु सीमा हुन्छ । इन्जिन आयलको म्याद पनि निश्चित समयपछि सकिन्छ । इन्जिन आयलको आयु २ देखि ५ वर्षसम्म हुन्छ। तर, एकपटक खोलिसकेपछि ६ देखि १२ महिनाभित्र नै प्रयोग गर्नुपर्छ। अन्यथा, यसको चिप्लोपन क्षमतामा ह्रास आउँछ र यसले इन्जिनमा नराम्रो असर पार्न सक्छ । इन्जिन आयल परिवर्तन गर्दा यसको उत्पादन र म्याद समाप्ति मिति जाँच गर्नुपर्छ । रिपोर्टका अनुसार गाडीको इन्जिन आयल हरेक ५ हजार देखि ७ हजार ५०० किलोमिटरमा परिवर्तन गर्नुपर्छ । यद्यपि यो सवारी साधनको मोडल र ड्राइभिङ अवस्थामा निर्भर गर्छ।

म्याद सकिएको इन्जिन आयल कसरी पहिचान गर्ने? :गाडीको इन्जिन आयल कहिले परिवर्तन गर्नुपर्छ भन्ने कुरा जान्नु धेरै महत्त्वपूर्ण छ। इन्जिन आयलको अवस्था जान्नको लागि इन्जिनबाट केही तेल निकाल्नुपर्छ । यदि यसमा हल्का रङगको सट्टा कालो देख्नुभयो र नराम्रो गन्ध आयो भने बुझ्नुहोस् कि कारको इन्जिन तेल परिवर्तन गर्ने समय भयो। साथै यदि कारले धेरै धुवाँ निकालिरहेको छ भने, यो पनि इन्जिन आयल परिवर्तन गर्ने संकेत हो ।

खराब इन्जिन आयलको इन्जिनमा पर्ने प्रभाव : यदि इन्जिन आयल सही समयमा परिवर्तन गरिएन भने इन्जिनमा नराम्रो असर पर्छ। खराब तेलले इन्जिनमा घर्षण बढाउँछ, जसले गर्दा इन्जिनका पार्टपुर्जा तातो हुन्छ । यसको इन्जिन भित्रको कुलिङमा दबाब बढ्छ। यसले इन्जिनका पार्टपुर्जाको आयु घटाउन सक्छ। लामो समयसम्म पुरानो तेल प्रयोग गर्नाले सम्पूर्ण इन्जिन सिस्टमलाई क्षति पुर्‍याउन सक्छ ।

इन्जिनको दीर्घायु र राम्रो प्रदर्शनको लागि तेलको सही छनोट, भण्डारण र समयमा परिवर्तन अनिवार्य छ।