किलेस इन्ट्री वा पुस स्टार्ट सिस्टम : फाइदा के ? बेफाइदा के ?

पछिल्लो केही समय यता कारमा नयाँ प्रविधिको रुपमा किलेस इन्ट्री अर्थात पुुस स्टार्ट बटन उपलब्ध भएको पाइन्छ । परम्परागत चाबी कुनै इग्निसन स्लटमा घुसाउनुको सट्टा किलेस इन्ट्री सिस्टममा चाबीलाई खल्तीमै राख्न सकिन्छ ।

कारमा भएका विभिन्न एन्टेना र रेडियो पल्स जेनेरेटरले की हाउजिङमार्फत स्मार्ट की पहिचान गरेर आवश्यक कार्य गर्छ । कुनै बटन वा सेन्सरको सहयोगले गाडी लक, अनलक र स्टार्ट हुने कार्य गर्छ । स्मार्ट की सिस्टममा भएको मेकानिकल ब्याकअपले यसमा सहयोग गर्छ ।

सन् १९९५ मा सिमेन्सले अन्वेषण गरेको सो प्रविधिलाई सबैभन्दा पहिले सन् १९९८ मा मर्सिडिज बेन्जले ‘कि–लेस गो’ को नाममा प्रयोगमा ल्याएको थियो । हाल बीएमडब्ल्यु र मर्सिडिज बेन्जका गाडीमा यो प्रविधि स्ट्यान्डर्ड रुपमा प्रयोग हुन थालेको छ भने अन्य धेरै कम्पनीले समेत यसको प्रयोग बढाउदै गएका छन् ।

यद्यपि किलेस इन्ट्री प्रविधिका आफ्नै फाइदा र बेफाइदा छन् ।

फाइदाहरु

ह्यान्ड्स फ्रि अपरेसन

हातमा कुनै अन्य वस्तु छ भने पनि समस्या हुँदैन । गाडीको रेन्जमा प्रवेश गरे पश्चात ढोका लगायतका अन्य आवश्यक वस्तु आफै खुल्छन् । कतिपय गाडीमा त झन् खुट्टाले टेक्दा नै ढोका आफै खुल्ने हुन्छ ।

थप सुरक्षाको प्रत्याभूति

आफ्नो कार स्टार्ट गर्नका लागि फरक खाले कोड चाहिने भए पछि ढुक्क हुन सकिन्छ । किलेस, पुस–बटन इग्निसन, इलेक्ट्रोनिक की आदिका लागि आधिकारिक ड्राइभिङ अनुमति चाहिन्छ र यसका लागि पावर एसेसरिज आवश्यक पर्छ । कोड बुझे पछि मात्र गाडी स्टार्ट हुन वा अनलक हुन सक्छ । यसबाट गाडीधनीले थप सुरक्षाको अनुभूति गर्न सक्छन् ।

अटोमेटिक लक

कहिलेकाहिं हतारमा पार्किङ गरे पश्चात गाडी लक गर्न बिर्सन्छ । यसले गर्दा कहिलेकाहिं ठूलै क्षति पनि हुन सक्छ । तर कारबाट निस्के पछि यो प्रविधिको कारण कार आफै लक हुन्छ । यसले गर्दा सुरक्षित हुन्छ ।

फाइदा मात्र होइन, यो प्रविधिका बेफाइदा पनि छन् । यसका बेफाइदालाई यसरी वर्णन गर्न सकिन्छ ।

महंगो

प्रविधि प्रयोग गरे पछि केही महंगो पर्ने नै भयो । यो प्रविधि भएका गाडी केही महंगो पर्न जान्छन् ।

कार स्वचालित हुने

कहिलेकाहिं इन्जिन अन भइरहदा कारको लाइट र अन्य इलेक्ट्रोनिक्सले मन्द रुपमा कार्य गरिरहन्छ । धेरै ब्रान्डेड कार आफै अफ हुन्छन्, तर कमसल ब्रान्डको भयो भने इन्धन नसकिदा सम्म स्वचालित रुपमा इन्जिन चल्छ र यसले खराबी ल्याउन सक्छ ।

स्मार्ट बन्दै चोर

प्रविधि जति विकसित हुँदै जान्छ, उति नै चोरहरुले पनि नयाँ प्रविधिको विकास गर्छन् । ह्याकरहरुले यसमा भूमिका खेल्न सक्छन् । की प्रोग्रामिङ टुल्स र चिपहरु अनलाइन रुपमा पाउन सकिन्छ । यसले गर्दा चोरहरुले प्रविधिको दुरुपयोग गरी गाडी चोर्न झनै सहज हुन सक्छ ।

यी सबै फाइदा र बेफाइदा हुँदा हुँदै पनि आगामी दिनमा यस्ता प्रविधिलाई अझै गुणस्तरीय बनाएर कार प्रयोग अझै सहज बन्दै जाने आशा गर्न सकिन्छ ।