रेगुलर नेक्सन ईभीको तुलनामा यस्तो फरक छ डार्क एडिसन : स्पेसल भएकैले सोल्ड आउट

टाटा मोटर्सको निकै नै लोकप्रिय इलेक्ट्रिक एसयूभी नेक्सनको डार्क एडिसन नेपाली सोरुममा आइपुगेको छ । रेगुलर नेक्सन ईभीको तुलनमा २ लाख रुपैयाँ बढी मूल्य राखेर यसको वुकिङ समेत खुल्ला गरिएको छ ।

हाल कारोबार भैरहेको रेगुलर नेक्सन ईभीको स्पेशल एडिसन यो कार एक्सजेड प्लस र एक्सजेड प्लस लक्जरी गरी कुल दुई भेरिएन्टमा नेपाल आएको हो । जसको मूल्य ४२ लाख र ४४ लाख रुपैयाँ निर्धारण गरिएको छ । यसको रेगुलर भेरिएन्टमा एक्सजेड प्लसको ४० लाख र एक्सजेड प्लस लक्जरीको ४२ रुपैयाँमा करोबार भैरहेको छ ।

२ लाख रुपैयाँ वढी रकम तिरेर खरिद गर्दा यो गाडीमा ग्राहकले पाउने एकमात्र फरक भनेको व्ल्याक कलर थिम हो । ब्याट्री प्याक, मोटर र अन्य विशेषताहरु रेगुलर मोडलबाटै लिइएको यो नयाँ एडिसनलाई स्पेसल बनाउन टाटा मोटर्सले एक्स्टेरियर र इन्टेरियर लगायत सम्पूर्ण भागमा कालो रङलाई आकर्षक तवरबाट समायोजन गरेको छ ।

इलेक्ट्रिक ब्लु एसेन्ट सहित ब्ल्याक कलर थिममा डिजाइन गरिएको यो कारको ड्यासवोर्डलाई पियानो ब्ल्याक कलर र सिट लगायत सिट बेल्ट र अन्य इन्टेरियर फिचर्सलाई डार्क थिममा सजाइएको छ । जसका कारण रेगुलर नेक्सन ईभी भन्दा यो कार देख्दा भिन्दै र निकै आकर्षक देखिन्छ । नेपाली ग्राहकले निकै नै रुचाएको यसको रेगुलर नेक्सन ईभी निलो र सेतो रङमा उपलब्ध रहँदै आएको छ ।

स्पेसल एडिसन भने पछि सामान्य एडिसन भन्दा फरक हुन्छ । यो धेरै संख्यामा उत्पादन पनि गरिदैन । ब्ल्याक कलर थिममा भएकाले यो सडकमा गुडाउदा पनि निकै नै फरक देखिने अनुमान गरिन्छ । यसले गर्दा नै ग्राहकले यस्ता स्पेसल एडिसन रुचाउने गर्छन् ।

नेपालको सन्दर्भमा पनि त्यही कुरा लागू हुने टाटा मोटर्सको नेपालका लागि आधिकारिक वितरक सिप्रदी ट्रेडिङले जनाएको छ । स्पेसल एडिसन भएकैले हाल केही संख्यामा मात्र उपलब्ध यो ईभी सोल्ड आउट भइसकेको सिप्रदी स्रोतले जनाएको छ । अब बुकिङ गर्नेले स्पेसल एडिसन पाउन कमसेकम एक महिना देखि तीन महिना सम्म पर्खिनु पर्ने अवस्था छ ।